Prezıdent álem birinshiliginde tamasha óner kórsetken Krıstına Shýmekovany quttyqtady

ASTANA.KAZINFORM —  Memleket basshysy jasóspirimder arasynda konkımen júgirýden ótken álem birinshiliginde tamasha óner kórsetken Krıstına Shýmekovany quttyqtady. Bul týraly Aqordanyń baspasóz qyzmeti habarlady. 

 Qasym-Jomart Toqaev Krıstına Shýmekovanyń úsh altyn medal men absolıýtti álem chempıony ataǵyna ıe bolýyn otandyq sport tarıhyndaǵy erekshe oqıǵa retinde baǵalady.

Prezıdenttiń aıtýynsha, atlet mundaı tabysqa talant pen tabandy eńbektiń, temirdeı tártip pen jeńiske degen muqalmas jigerdiń arqasynda jetti.

Sondaı-aq ol Krıstınanyń aldaǵy ýaqytta da bıik belesterdi baǵyndyra berýine tilektestik bildirdi.

Aıta ketelik Germanııanyń Intsell qalasynda ótip jatqan jasóspirimder arasyndaǵy álem chempıonatynda qazaqstandyq sportshy úshinshi altyn medalin jeńip alǵan edi.