Prezıdent Kreatıvti ındýstrııany damytý qorynyń keńsesin aralap kórdi

Qasym-Jomart Toqaev qor jumysymen tanysty. Bul Memleket basshysynyń tapsyrmasyna saı otandyq kreatıvti sektordy qoldaýdyń negizgi ınstıtýty retinde qurylǵan.

Prezıdentke jańa keńistiktiń shyǵarmashyl jastar, ınvestorlar men týrıster bas qosatyn orynǵa aınalatyny jóninde baıandaldy. 

Shoýrým formatynda bezendirilgen keńsede kreatıvti ónim ázirleýdiń tolyq tsıkli kórsetilgen. Sol arqyly kópshilik qarapaıym ıdeıany óndiriske aınaldyrýǵa deıingi shyǵarmashylyq úrdistiń qalaı júrgiziletinin tamashalaı alady. 

Memleket basshysy zergerlik jáne aǵash sheberhanalaryn, mýzyka, kilem toqý, beıneleý óneri zaldaryn, fashion-aımaqty aralady. 

Yurt Capsule – mundaǵy negizgi orynnyń biri. Bul keńistikte kıiz úıdiń dástúrli formasy tehnologııalyq turǵydan jańa keıipke engen. Joba tsıfrlyq ónerdi, mýltımedııalyq kontentti jáne mádenı storıtellıngti bir arnaǵa toǵystyrady. 

Qasym-Jomart Toqaevqa elimizdiń brendin qalyptastyrý tujyrymdamasy jaıynda málimet berildi. Bastama mádenı muralarymyzdy zamanǵa saı jańasha ınterpretatsııalaý, kreatıvti ındýstrııany damytý jáne ulttyq biregeılikti nyǵaıtý arqyly elimizdiń týrıstik áleýetin arttyrýdy kózdeıdi. 

Kreatıvti ındýstrııany damytý qory talantty jastardy izdep taýyp, olarǵa qoldaý kórsetý, ınvestıtsııa tartý, ınfraqurylymdy jetildirý sekildi tórt negizgi baǵyt boıynsha jumys isteıdi. Otandyq kreatıvti ónimderdi syrtqy naryqqa shyǵarýǵa yqpal etedi. Sonymen qatar barlyq oblys ortalyǵynda ashylǵan óńirlik habtardyń qyzmetin úılestiredi. 

Búginde Qazaqstannyń kreatıvti ekonomıka salasynda shamamen 48 myń kásipkerlik nysan bar. Olar 160 myńǵa jýyq adamdy jumyspen qamtyp otyr. Indýstrııaǵa kıno, anımatsııa, geımdevelopment, tsıfrlyq óner, sán, dızaın jáne halyqtyq qolóner sekildi salalar zor úles qosyp jatyr. 

Buǵan deıin Memleket basshysy «Taza Qazaqstan» aktsııasyna belsene qatysqan azamattardy marapattaǵanyn jazǵan edik.