Prezıdent QR UQK sybaılas jemqorlyqqa qarsy is-qımyl qyzmeti týraly erejeni bekitti
ASTANA.KAZINFORM - Qazaqstan Prezıdenti Qasym-Jomart Toqaev Ulttyq qaýipsizdik komıtetiniń qyzmetin jetildirý týraly Jarlyqqa qol qoıdy. 2025 jylǵy 14 shildedegi qujatqa sáıkes QR UQK sybaılas jemqorlyqqa qarsy is-qımyl qyzmeti týraly ereje bekitildi.
Erejege sáıkes, sybaılas jemqorlyqqa qarsy is-qımyl qyzmeti Ulttyq qaýipsizdik komıtetiniń vedomstvolyq bólimshesi bolyp sanalady jáne sybaılas jemqorlyq quqyq buzýshylyqtardy anyqtaý, jolyn kesý, ashý jáne tergeý boıynsha ókilettikterge ıe.
Organ tıisti ókilettikter bolǵan kezde azamattyq-quqyqtyq qatynastarda memlekettiń múddesin bildirýge quqyly. Bul rette bıznes sýbektilerimen onyń quzyretine kiretin fýnktsııalardy oryndaý úshin sharttar jasasýǵa tyıym salynady.
Negizgi mindetteri:
- sybaılas jemqorlyqqa qarsy saıasatty qalyptastyrýǵa jáne iske asyrýǵa qatysý;
- sotqa deıingi tergep-tekserýlerdi júzege asyrý;
- jedel-izdestirý jáne qarsy barlaý qyzmetin júrgizý; sybaılas jemqorlyq faktileri týraly aqparat bergen adamdardy qorǵaý;
- sybaılas jemqorlyq týraly ister boıynsha tárkilengen múlikti qadaǵalaý jáne ótkizý;
- halyqaralyq kelisimder sheńberinde memlekettik organdarmen jáne sheteldik áriptestermen ózara is-qımyl jasaý.
Budan basqa, quqyq buzýshylyq týraly ótinishterdi qabyldaý men tirkeýdi júrgizedi, zańnamany jetildirý boıynsha usynystar ázirleıdi, azamattar men uıymdarǵa sybaılas jemqorlyqqa qarsy is-qımyl máseleleri boıynsha keńes beredi, sondaı-aq qyzmettik múliktiń, oq-dárilerdiń jáne qorǵaý quraldarynyń saqtalýyn qamtamasyz etedi.
Bólimsheniń qyzmetin qamtamasyz etý sheńberinde materıaldyq-tehnıkalyq jaraqtandyrý, jaýyngerlik kezekshilikti uıymdastyrý, oqý is-sharalaryn ótkizý, aqparattyq qaýipsizdik jónindegi sharalardy iske asyrý jáne shıfrlaý jáne kommýnıkatsııalyq júıelerdiń jumys isteýi kózdelgen.
Sondaı-aq UQK týraly jalpy erejege ózgeris engizildi. Komıtet mindetteriniń tizbesine sybaılas jemqorlyq quqyq buzýshylyqtardy anyqtaý jáne tergeý qosyldy. Komıtet aýmaqtyq qorǵanys mindetterin iske asyrýǵa qatysýdy jáne mazmuny bıýdjetten qarjylandyrylatyn jabyq áskerı obektilerdiń tizbesin bekitýdi qosa alǵanda, qosymsha fýnktsııalarǵa ıe boldy.
Jańa redaktsııada turǵyn úı komıssııalarynyń qyzmetine, aqparattyq júıelerge, sondaı-aq qoldanystaǵy rezervtiń qyzmetkerleri men áskerı qyzmetshilerine turǵyn úı tólemderin berý tártibine qatysty normalar baıandalǵan.
Jarlyq qol qoıylǵan sátten bastap kúshine enedi.
Buǵan deıin Memleket basshysy birqatar zańǵa qol qoıdy. Іshinde Salyq kodeksine túzetý engizetin jáne turǵyn úı-kommýnaldyq sharýashylyǵy máselesine qatysty quqyqtyq qujattar bar. Jańa zańdar qoǵamǵa qalaı áser etedi? Salalarda nendeı ózgeris bolýy múmkin? Kazinform tilshisi tarqatyp kórdi.