Prezıdent: QR men RF aýyl sharýashylyǵy mınıstrlikteri birlesken jumysty kúsheıtýi tıis

NUR-SULTAN. QazAqparat – Qazaqstan men Reseıdiń aýyl sharýashylyǵy mınıstrlikteri bir-birimen belsendi aralasa jumys júrgizýi tıis. Reseıdiń Omby qalasynda ótip jatqan «Shekara mańy yntymaqtastyǵyn damytýdyń ózekti máseleleri» atty Qazaqstan men Reseı arasyndaǵy XVI óńiraralyq yntymaqtastyq forýmynda Qasym-Jomart Toqaev osylaı dedi, dep habarlaıdy QazAqparat tilshisi.

«Eki eldiń aýyl sharýashylyǵy mınıstrlikteri boljamdy balansty aıqyndaý maqsatynda bir-birimen belsendi túrde aralasýy kerek. Kez kelgen eldiń ekonomıkasynyń asa mańyzdy salalarynyń biri – aýyl sharýashylyǵy ekeni qupııa emes. Bul salaǵa baqylaý organdarynyń nazary erekshe aýatyny túsinikti. Biraq, ol nazar shekten shyǵyp ketpeýi kerek. Sol sebepti ákimshilik kedergilerdi eńserip, týyndaǵan máselelerdi sheshýde jyldamdyqty qamtamasyz etý úshin tıisti mınıstrlikter men vedomstvolar kúndelikti baılanysta bolýy kerek», - dedi Memleket basshysy.

Qasym-Jomart Toqaev týyndaǵan máseleler boıynsha tıisti vedomstvolar ózara jyldam áreket etetindeı naqty algorıtmderdi ázirleýdi usyndy. Prezıdenttiń aıtýynsha, veterınarııa, fıtosanıtarııa jáne karantındik ónimderdi baqylaý salasyndaǵy birlesken jumys ortalyq memlekettik organ men óńirlik bólimsheler deńgeıinde júrgizilýi tıis.

«Ózara tájirıbe almasý jaǵynan da birige jumystardy kúsheıtý kerek. Ǵylymı zertteýlerdiń úzdik nátıjelerin almasqan abzal. Menińshe, eki eldiń jetekshi bilim berý ınstıtýttarynyń bazasynda biliktiligin arttyrý boıynsha birlesken baǵdarlamasyn ázirleý týraly da oılanýdyń mańyzy óte zor. Quqyq boıynsha qoldanýǵa bolatyn amal-ádisterdi úılestirý – ulttyq baqylaý júıelerine, bizdiń mamandardyń biliktiligine degen senimli kúsheıtip, tutynýshylardyń qaýipsizdigin arttyrady. Seriktestiktiń keleshegi zor salalardyń biri – aýyl sharýashylyǵy shıkizatyn birlese jiti óńdeý salasy bolmaq. Bul rette Qytaı naryǵynda jumys isteý boıynsha Qazaqstan men Reseıdiń tájirıbesi bar. Meniń oıymsha, bul salada da aıtarlyqtaı tabysqa jetemiz», - dedi ol.

Eske sala keteıik, biz buǵan deıin Qazaqstan Prezıdentiniń óńiraralyq yntymaqtastyq forýmyna qatysý úshin Ombyǵa ushyp kelgenin jazǵan bolatynbyz.