Prezıdent QR qaýipsizdigin nyǵaıtýǵa qosqan úlesi úshin birqatar azamattardy «Aıbyn» ordenimen marapattady
«Búgingi marapat memlekettiń sizderge degen senimi jáne úlken eńbekterińizdiń baǵalanýy bolyp sanalady. Sondyqtan osy joǵary qurmetti ary qaraı alyp júresizder dep, sondaı-aq árqashanda jastarǵa úlgi bolatyndaı qyzmet etesizder dep senemin»,- dedi Prezıdent marapattaý rásiminde.
Elbasy osy nagradany QR Memlekettik kúzet qyzmetiniń basqarma bastyǵy Raýshan Jambylova men QR Ulttyq qaýipsizdik komıteti departament bastyǵynyń birinshi orynbasary Sergeı Klımchýkke tapsyrdy.
Munymen qosa, ІІ dárejeli «Aıbyn» ordenimen QR Qorǵanys mınıstrligi 14776 áskerı bólimi komandıriniń orynbasary Arystan Muqataev pen QR Ulttyq qaýipsizdik komıteti Shekara qyzmeti jeke avıatsııalyq eskadrılıanyń komandıri Erbolat Smaǵulov marapattaldy.
Al ІІІ dárejeli «Aıbyn» ordenimen QR Ulttyq ulan «Ońtústik» óńirlik qolbasshylyǵy 7552 áskerı bólimi atqyshtar batalonynyń bólimshe komandıri Jandos Baıanbaev, QR Qorǵanys mınıstrligi 53898 áskerı bólimi avıatsııalyq eskadrılıasynyń aǵa avıatsııalyq mehanıgi Batyrjan Moınov, QR Memlekettik kúzet qyzmeti 0112 áskerı bóliminiń bólimshe komandıri Ǵalymjan Toıshybaev marapattaldy.