Prezıdent kóterme-taratý ortalyqtary jelilerin iske qosý jumystaryn synady

NUR-SULTAN. QazAqparat –Búgin Úkimettiń keńeıtilgen otyrysynda Prezıdent Qasym-Jomart Toqaev kóterme-taratý ortalyqtary jelilerin iske qosý jumystary uzaqqa sozylyp ketkenin synady, dep habarlaıdy QazAqparat tilshisi.

Memleket basshysy eki jyldan astam ýaqyt buryn kóterme-taratý ortalyqtary jelilerin qamtı otyryp, Ulttyq taýar ótkizý júıesin iske qosýǵa tapsyrma bergenin eske saldy.

«Alaıda Úkimet ony oryndaý qadamdaryn uzaqqa sozyp jiberdi. Josparlar men jarııa málimdemeler qaǵaz júzinde qaldy. Іri kásipkerlermen birlese memlekettik-jekeshelik seriktestik shemasy boıynsha kóterme-taratý ortalyqtarynyń qurylys jobalary júzege asyrylmaı qaldy», - dedi Prezıdent.

Bul turǵyda Qasym-Jomart Toqaev osy salada atqarylǵan jumystar boıynsha qazan aıynda Úkimet baıandaýy tıis ekenin atap ótti.

Osy oraıda Prezıdent bul salaǵa qyzyǵýshylyq tanytqan ınvestorlardy tartýdy tapsyrdy.

Budan buryn habarlanǵandaı, Prezıdent Úkimettiń baǵany turaqtandyrýǵa baǵyttalǵan sharalary tıimsiz bolǵanyn aıtty.

Foto: vitalbgs.com