Prezıdent Qostanaı oblysynyń kásipkerlerimen jáne eriktilerimen kezdesti
QOSTANAI. KAZINFORM — Memleket basshysy Qostanaı oblysyna jumys sapary barysynda sý tasqyny saldaryn eńserýge járdemdesken bıznes ókilderimen jáne eriktilermen júzdesti. Bul týraly Aqordanyń baspasóz qyzmeti málim etti.
Kezdesýge óńirdegi mashına jasaý, taý-ken, tamaq jáne aýyl sharýashylyǵy ónerkásibi salalarynyń jetekshileri, Qazaqstan halqy Assambleıasynyń jergilikti ókilderi, oblystyq jastar resýrstyq ortalyǵynyń eriktileri jáne stýdentter qatysty.
Qasym-Jomart Toqaev shaǵyn jáne orta bızneske qoldaý kórsetý basty mindet ekenin atap ótti.
– Osy kezdesýge biraz metsenat qatysyp otyr. Men sizderge rızashylyǵymdy bildiremin. Bul – sizderdiń júrek qalaýlaryńyz, azamattyq jaýapkershilikterińizdiń kórinisi. Munyń bárin marapat úshin emes, shynaıy nıetpen jasalǵan ıgi is dep bilemin, – dedi Prezıdent.
Prezıdent eriktilerge zor qurmetpen qaraıtynyn jáne jan-jaqty qoldaý kórsetetinin atap ótip, olarǵa rızashylyq bildirdi.
Buǵan deıin habarlaǵanymyzdaı, Memleket basshysy Soltústik Qazaqstan oblysyna jumys saparymen bardy. Qasym-Jomart Toqaevtyń jumys sapary Sergeevka sý qoımasyn, Qyzyljar aýdanyn jáne Petropavl qalasynyń tóńiregin tikushaqpen aralap kórýden bastaldy. Sondaı-aq Prezıdent Petropavl sý torabynda boldy.
Búgin sondaı-aq memleket basshysy sapar barysynda tabıǵı apatpen kúresip júrgen azamattarǵa alǵys aıtqanyn jazǵan bolatynbyz.
Soltústik Qazaqstan oblysynan keıin Prezıdent borty Qostanaı oblysyna ushyp barǵanyn da habarlaǵan edik. Memleket basshysy Qostanaı oblysyndaǵy sý tasqynyna baılanysty jaǵdaımen tanysqan bolatyn.
Búgin sondaı-aq, prezıdent Qostanaı óńirine sapary barysynda aqbókenderdi atýǵa tyıym salynatynyn málimdedi.
