Memleket basshysy Qosshyny damytý boıynsha tapsyrma berdi
ASTANA. KAZINFORM — Prezıdent Aqmola oblysynyń ákimi Marat Ahmetjanovty qabyldady. Bul týraly Aqordanyń baspasóz qyzmeti habarlady.
Qasym-Jomart Toqaevqa Aqmola oblysynyń bıylǵy birinshi jartyjyldyqtaǵy áleýmettik-ekonomıkalyq damýy men óńirdi órkendetý perspektıvasy jóninde baıandaldy.
Marat Ahmetjanov oblysta barlyq negizgi kórsetkish boıynsha ósim saqtalyp otyrǵanyn jetkizdi.
Aýyl sharýashylyǵy:
Óńir aýyl sharýashylyǵy ónimderiniń jalpy kólemin 1,2 trıllıon teńgege deıin jetkizip, eldiń agrarlyq sektorynyń kóshbasshysy retindegi ornyn nyǵaıtýdy kózdep otyr;
Bıyl ónimdiligi óte joǵary, sonyń ishinde maıly daqyldar alqaby 2,5 ese ulǵaıdy.
Investıtsııalyq jobalar:
Arshaly aýdanynda respýblıkalyq mańyzy bar Aqmola ındýstrııalyq aımaǵy quryldy;
Jalpy quny 4 mıllıard dollardan asatyn ınvestıtsııalyq portfel jasaqtaldy. Osy arqyly 10 myńǵa jýyq jumys orny ashylady.
Áleýmettik ınfraqurylymdar:
Sońǵy eki jyl ishinde 4,7 myń turǵyn baspanaly boldy. Bul aldyńǵy jeti jyldyń kórsetkishine teń;
Kezekte turǵan halyqtyń áleýmettik osal toby 29 paıyzǵa azaıdy;
Qosshy qalasynda úleskerlerdiń máselesi oń sheshilip jatyr.
Bilim:
Eki jyl ishinde 21 myń oqýshyǵa arnalǵan 33 nysan boı kóterdi.
Jańa oqý jyly qarsańynda óńirde apatty jaǵdaıdaǵy jáne úsh aýysymdy mektepter máselesi tolyq sheshildi.
Turǵyn úı-kommýnaldyq sharýashylyq:
Jylytý maýsymyna daıyndyq josparǵa saı júrgizilip jatyr;
Kókshetaýda elektr qýaty 240 Mvt, al jylý qýaty 520 Gkal/saǵat bolatyn jylý elektr ortalyǵy salyna bastady;
Sý tazartý nysandarynyń qurylysy aıaqtalýǵa jaqyn;
Oblys ortalyǵynda turatyn 200 myń turǵyn sapaly aýyz sýmen qamtylady;
Jyl sońyna deıin 9 eldi mekenge gaz qubyry tartylady.
Prezıdent:
Renovatsııa baǵdarlamasy arqyly halyqtyń áleýmettik osal tobyn baspanamen qamtýdaǵy oblystyń oń tájirıbesin atap ótti.
Egin jınaý naýqanyn uıymdastyrý, Qosshy qalasynyń damýy boıynsha tıisti sharalardy qabyldaý, sý tasqynyna qarsy júıeli jumys júrgizý, sondaı-aq ınvestıtsııa tartý jóninde naqty tapsyrma berdi.
Aıta ketelik búgin Prezıdent óńir basshylarymen birqatar kezdesý ótkizedi.