Prezıdent Kóshpendiler oıyndarynyń jeńimpazdaryn jastarǵa chempıonǵa laıyq úlgi kórsetýge shaqyrdy
ASTANA. KAZINFORM – Sporttaǵy árbir jetistik – jyldar boıǵy qajyrly eńbektiń, tabandylyq pen sheberliktiń nátıjesi. Bul týraly VI Dúnıejúzilik kóshpendiler oıyndary jeńimpazdaryn marapattaý rásiminde Memleket basshysy Qasym-Jomart Toqaev aıtty.
- Sizderdi Táýelsizdik saraıyna arnaıy shaqyrdym. Táýelsizdik – eń qasterli uǵym, bárinen qymbat qasıetti qundylyq. Halqymyz óziniń asqaq rýhyn tý etip, berekeli birliginiń arqasynda ǵasyrlar boıy ańsaǵan egemendikke qol jetkizdi. Bul ǵımarat ulttyq namys pen eren eńbektiń nyshany, sımvoly desek, qate bolmaıdy. Sporttaǵy árbir jetistik – jyldar boıǵy qajyrly eńbektiń, tabandylyq pen sheberliktiń nátıjesi. Sizderdiń jeńisterińiz eń aldymen óskeleń urpaqqa jiger beredi. Jastar sizderge qarap boı túzeıdi. Bul – úlken mártebe jáne zor jaýapkershilik, - dedi Qasym-Jomart Toqaev.
Memleket basshysynyń paıymynsha, jeńimpaz, chempıon bolý – bir basqa, jeńimpazǵa, chempıonǵa laıyq úlgi kórsetý – bir bólek.
- Jas urpaqty tabandy, qaısar, shydamdy bolýmen qatar, olardy ádepti, mádenıetti, tııanaqty bolýǵa úıretý óte mańyzdy. Sonda jastarymyzdyń táni de, jany da, sanasy da sergek bolady. Kók týymyz árdaıym bıikte jelbiresin! Qazaq eli máńgi jasasyn!, - dep túıindedi sózin Memleket basshysy.
Aıta keteıik, Qazaqstan quramasy 31 tamyz ben 6 qyrkúıek aralyǵynda Qyrǵyzstanda ótken VI Dúnıejúzilik kóshpendiler oıyndarynda 74 medal jeńip aldy.
