Prezıdent kóshi-qon úderisterin jappaı tsıfrlandyrýdy óte ózekti másele retinde atady

ASTANA. KAZINFORM – Memleket basshysy Qasym-Jomart Toqaev Bas prokýratýrada ótken jıynda kóshi-qon úderisterin jappaı tsıfrlandyrýdyń ózektiligine toqtaldy. Bul týraly Aqordanyń baspasóz qyzmeti habarlady. 

– Kóshi-qon úderisterin jappaı tsıfrlandyrý kerek. Bul – óte ózekti másele. Baıaǵydan beri talqylap jatyrmyz, durys, oń nátıje az. Qazir álemde kúrdeli ahýal qalyptasyp otyr. Dúnıe júzinde keń aýqymdy kóshi-qon júrip jatyr desek, qate bolmaıdy. Qonys aýdarǵysy keletin sheteldikter úshin Qazaqstan – basqa elderge ótýge de, turaqtap qalýǵa da qolaıly memleket. Elge kelgen shetel azamattaryn ýaqtyly esepke alyp, olardyń júris-turysyn baqylaıtyn tehnıkalyq quraldardy jetildirý – asa mańyzdy mindet. Úkimetke Ulttyq qaýipsizdik komıtetimen birlesip, osy jumysty tezdetýdi tapsyramyn, - dedi Prezıdent.

Eske sala keteıik, buǵan deıin Qasym-Jomart Toqaevtyń Bas prokýratýrada jıyn ótkizgenin jazǵan edik.