Prezıdent koronavırýstyń taralýy týraly: Táýekelge baryp otyrmyz
NUR-SULTAN. QazAqparat – Prezıdent Qasym-Jomart Toqaev koronavırýs qaýpine baılanysty aımaq basshylaryna erekshe jaýapkershilik artylyp otyrǵanyn eske saldy, dep habarlaıdy QazAqparat tilshisi.
«Mundaı jaǵdaıda aımaq basshylary men ortalyqqa baǵynyshty qala basshylarynyń jaýapkershiligi edáýir salmaqty sıpatqa ıe bolýda. Týrasyn aıtqanda – biz táýekelge baryp otyrmyz. Biraq bizde basqa amal da joq. Azamattar úshin qatań karantın rejımi, stýdentter men mektep oqýshylaryn, balabaqsha balalaryn qashyqtan oqytý – kúshinde qalady. Qoǵamdyq oryndardy dezınfektsııalap turý kerek. Alaıda kásiporyndardy birtindep jumys rejımine aýystyramyz», - dedi Qasym-Jomart Toqaev Tótenshe jaǵdaı rejımin qamtamasyz etý jónindegi memlekettik komıssııanyń otyrysynda.
Osyny aıta kele Memleket basshysy basty basymdyq týraly umytpaýdy eske saldy.
«Taǵy da bir aıtyp óteıin: azamattarymyzdyń densaýlyǵy – eń úlken basymdyq osy. Ortaq jumysymyzda osyny árdaıym este saqtaýymyz kerek», - dedi Prezıdent.
Eske sala ketsek buǵan deıin QR Prezıdentiniń baspasóz hatshysy Berik Ýálı Qasym-Jomart Toqaevtyń tóraǵalyǵymen Tótenshe jaǵdaı jónindegi Memlekettik komıssııanyń otyrysynda TJ rejımin sáýirdiń aıaǵyna deıin sozýdy tapsyrǵanyn habarlaǵan edi.
