Prezıdent koronavırýspen kúresýdiń birden-bir ári senimdi joly vaktsına salý ekenin aıtty
NUR-SULTAN. QazAqparat - Memleket basshysy epıdemıologııalyq ahýal jóninde ótken keńeste koronavırýspen kúresýdiń birden-bir ári senimdi joly vaktsına salý ekenin aıtty, dep habarlaıdy QazAqparat Aqordaǵa silteme jasap.
Muny lokdaýnnan shyǵý jolyn erterek oılastyrǵan elderdiń tájirıbesi dáleldedi. Búginde olardyń ekonomıkasy men azamattary kúndelikti ómirde pandemııanyń zardabyn tartyp otyrǵan joq. Izraıl men Birikken Arab Ámirlikterinde, vaktsına saldyrýdan kósh basyndaǵy elderde týrızm, saýda, meıramhanalar jelisi, shaǵyn jáne orta bıznes sekildi pandemııa alǵashqylardyń biri bolyp sharpıtyn salalardyń jumysy qaıta jandanǵan. COVID-19 indetimen kúreste Qytaı Halyq Respýblıkasy aıtarlyqtaı jetistikterge jetti. Pandemııa qaýpine shuǵyl áreket ete bilý men jumyla jumys isteý qabileti Qytaıdyń indetke qarsy tıimdi kúresýine múmkindik berdi.
«Qytaı álemde alǵashqylardyń biri bolyp koronavırýstyń jappaı taralýyn aýyzdyqtaı aldy. Sóıtip aýrý juqtyrǵandardyń sanyn azaıtty. Ekonomıkanyń qaıta qalpyna kelýin qamtamasyz etti. Qytaıdyń úlgisimen Azııanyń Japonııa, Ońtústik Koreıa, Vetnam jáne Sıngapýr sııaqty elderi de pandemııaǵa qarsy naqty is-qımyldar jasady. Sondyqtan bizge pandemııaǵa qarsy kúreste jáne vaktsına salý kezinde Qytaıdyń osy utymdy tájirıbesin eskergen jón. Jalpy Qytaı Qazaqstannyń uzaqmerzimdi strategııalyq seriktesi. Álemniń ekinshi ekonomıkasy bolyp sanalatyn bul elmen yntymaqtastyq biz úshin paıdaly ári memleketimizdiń ulttyq múddesine saı keletinin túsinýimiz kerek», – dedi Prezıdent.
Eske salsaq, 1 aqpanda Qazaqstanda koronavırýsqa qarsy vaktsınatsııa bastaldy.Tegin medıtsınalyq kómektiń kepildik berilgen kólemi aıasynda qazaqstandyqtarǵa koronavırýsqa qarsy egý tegin júrgiziledi.
Koronavırýspen aýyrǵan adamnyń antıdeneler tıtri joǵary bolsa jáne uzaq ýaqyt saqtalsa, vaktsına salýdyń qajeti joq.
Al eger antıdene tıtri ýaqyt óte kele tómendese nemese tórtinshi, altynshy aıda nólge deıin tússe, onda ımmýndaý máselesi týyndaýy múmkin.
26 qańtarda Úkimettiń keńeıtilgen otyrysynda Memleket basshysy Qasym-Jomart Toqaev ta koronavırýsqa qarsy qazaqstandyq vaktsınany saldyratynyn málimdegen edi.
Vaktsınalaý týraly tolyq aqparatty QazAqparat agenttiginiń arnaıy aıdarynan oqýǵa bolady.
