Prezıdent Qorǵanys mınıstrine Qarýly kúshterdiń jaýyngerlik daıarlyǵyn jetildirýdi tapsyrdy
ASTANA. KAZINFORM – Prezıdent Qasym-Jomart Toqaev qorǵanys vedomstvosynyń jyl basynan beri atqarǵan qyzmetiniń qorytyndysy, áskerı qyzmetshilerdi áleýmettik qorǵaý jáne áskerı qyzmettiń bedelin arttyrý jumystary jónindegi baıandamany tyńdady.
Qorǵanys mınıstri Dáýren Qosanov Prezıdentke Qarýly kúshterdiń jaýyngerlik daıarlyǵy, Tsıfrlandyrý jáne jasandy ıntellekt jyly aıasyndaǵy is-sharalar, vedomstvonyń avtomattandyrylǵan basqarý júıeleri men tsıfrlyq ınfraqurylymyn damytý týraly málimet berdi.
Sonymen qatar áskerı basqarý organdary arasyndaǵy baılanysty qamtamasyz etýge jáne áskerlerdiń jaýyngerlik áleýetin kúsheıtýge baǵyttalǵan «Batyl toıtarys – 2026» strategııalyq komandalyq-shtabtyq oqý-jattyǵýlaryna ázirlik barysyn baıandady.
Golan jotalaryndaǵy ekinshi ulttyq kontıngent mıssııasynyń sátti aıaqtalǵanyn jáne úshinshi kontıngenttiń rotatsııasy bastalǵanyn, sondaı-aq qazaqstandyq áskerı qyzmetshilerdiń beıbitshilik pen qaýipsizdikke qosqan úlesine halyqaralyq qoǵamdastyq tarapynan joǵary baǵa berilgenin jetkizdi.
Memleket basshysyna áskerge shaqyrý naýqany, áskerı qyzmetshilerdiń mártebesin kóterý boıynsha qolǵa alynǵan jumystar jóninde esep berildi.
Óskeleń urpaqty tárbıeleý, atap aıtqanda, 21-27 maýsym aralyǵynda Býrabaıda «Aıbyn – 2026» halyqaralyq áskerı-patrıottyq jastar jıynyn ótkizýge daıyndyq máselelerine nazar aýdaryldy.
Memleket basshysy Qarýly kúshterdiń jaýyngerlik daıarlyq júıesin jetildirýge, armııany tsıfrlyq turǵydan transformatsııalaýǵa jáne eldiń qorǵanys qabiletin nyǵaıtýǵa baǵyttalǵan birqatar mindet júktedi.
Aıta keteıik, Qasym-Jomart Toqaev AQSh pen Iran qol jetkizgen kelisimdi quptady.
