Prezıdent koreılerdiń Qazaqstanǵa qonys aýdarǵanyna 90 jyldyǵyn atap ótýdi usyndy
ASTANA. KAZINFORM - Qazaqstan Prezıdenti Qasym-Jomart Toqaev Koreıa Respýblıkasy Ulttyq Assambleıasynyń Spıkeri Cho Chjon Shıkpen kezdesý barysynda eki el arasyndaǵy baılanystardy damytý máselelerin talqylap, kelesi jyly koreılerdiń Qazaqstanǵa qonys aýdarǵanyna 90 jyl tolatynyn atap ótti.
Memleket basshysy Qazaqstan men Koreıa arasyndaǵy yntymaqtastyqty nyǵaıtýda zań shyǵarýshy organdardyń atqaratyn róline toqtaldy.
– Jalpy, sońǵy jyldary parlamentaralyq dıalog aıtarlyqtaı tereńdeı tústi. Qazaqstan Parlamenti men Koreıa Respýblıkasynyń Ulttyq Assambleıasy arasyndaǵy baılanystar turaqty túrde júzege asyrylýda. Osyndaı baılanystardy Quryltaı depýtattary belsendi túrde damyta bermek, – dedi Qasym-Jomart Toqaev.
Prezıdent ekijaqty qatynastardyń jekelegen aspektilerine de nazar aýdardy.
– Saýda-ekonomıkalyq jáne ınvestıtsııalyq baılanystarymyz nyǵaıyp kele jatyr. Bul – óte jaqsy úrdis. Qazaqstanda Koreıa kapıtaly bar myńnan astam birlesken kásiporyn jumys istep jatyr. Kóptegen mańyzdy salada birqatar birlesken jobalar júzege asyrylýda. Bizdiń mádenı-gýmanıtarlyq baılanystarymyzdyń tamyry tereńde. Qazaqstanda shamamen 120 myń kore-saram qaýymy, ıaǵnı etnıkalyq koreıler turady. Olar halyqtarymyz arasyndaǵy dostyqtyń «altyn kópiri» desek, artyq bolmaıtyn shyǵar. Ózińizge belgili, kelesi jyly koreı halqynyń Qazaqstanǵa qonys aýdarǵanyna 90 jyl tolady. Bul – tarıhı ýaqıǵa. Eki memleket birlesip, osy aıtýly mejeni joǵary deńgeıde atap ótýimiz kerek, – dedi Prezıdent.
Spıker Cho Chjon Shık Qazaqstan Prezıdentine yqylas tanytyp, Ulttyq Assambleıaǵa arnaıy kelgeni úshin alǵys aıtty.
– Eń aldymen, Sizdi konstıtýtsııalyq reforma jáne parlament saılaýynyń tabysty ótýimen quttyqtaımyn. Bul – Qazaqstan halqynyń Sizge Prezıdent retinde artqan senimi joǵary ekenin kórsetedi. Sońǵy jyldary Qazaqstan men Koreıa túrli saladaǵy yntymaqtastyqty dáıekti túrde nyǵaıtty. Sondyqtan osy saparyńyz aıasynda eki eldiń qarym-qatynasy bolashaqqa baǵdarlanǵan jan-jaqty strategııalyq seriktestik deńgeıine kóterilgenine qýanyshtymyn, – dedi Cho Chjon Shık.
Parlament tóraǵasy Qazaqstan Koreıanyń Ortalyq Azııadaǵy eń iri saýda jáne ınvestıtsııalyq seriktesi ekenin atap ótti. Onyń aıtýynsha, eki eldiń energetıka, tsıfrlandyrý jáne jasandy ıntellekt salalaryndaǵy yqpaldastyǵyn arttyrýdyń mańyzy zor. Sonymen qatar Cho Chjon Shık eki el arasyndaǵy mádenı-gýmanıtarlyq baılanystar men barys-keliske kóńil tolatynyn jetkizdi.
– Qazaqstan men Koreıa ózara tıimdi yntymaqtastyq pen ortaq ıgilik jolynda alǵa qaraı ilgerileı beredi. Koreıanyń Ulttyq Assambleıasy buǵan barynsha belsendi qoldaý kórsetedi. Sonymen qatar kelesi jyly kóktemde Qazaqstanda Ortalyq Azııa men Koreıa Respýblıkasy parlament tóraǵalarynyń tórtinshi kezdesýi ótedi. Atalǵan jıynǵa qatysýdy josparlap otyrmyn. Sol kezde Sizben Qazaqstanda júzdesemiz dep úmittenemin, – dedi Spıker.
Kezdesý qorytyndysy boıynsha taraptar Qazaqstan men Koreıa Respýblıkasy ekijaqty qatynastardyń barlyq baǵyty boıynsha yqpaldastyqty nyǵaıta túsetinine senim bildirdi.
Eske salaıyq, buǵan deıin Koreıa Prezıdenti Toqaevqa general Hon Bom Donyń súıegin qaıtarǵany úshin alǵys aıtqanyn habarlaǵanbyz.
