Prezıdent elimizge udaıy qoldaý kórsetip kele jatqan Eýropa Odaǵyna rızashylyǵyn bildirdi
ASTANA. KAZINFORM — Memleket basshysy bilim, ǵylym jáne akademııalyq utqyrlyq salalarynda udaıy qoldaý kórsetip kele jatqan Eýropa Odaǵyna rızashylyǵyn bildirdi. Onyń sózinshe, Eýropa Odaǵy osyndaı baılanystardy odan ári keńeıtýge beıil, dep habarlaıdy Aqordanyń baspasóz qyzmeti.
Qasym-Jomart Toqaev kelissóz barysynda tsıfrlandyrý baǵytyndaǵy yqpaldastyqty arttyrýǵa aıryqsha mán berilgenin jetkizdi.
— Qazaqstan men Eýropa Odaǵy ózara tájirıbe almasý jáne tehnologııalarǵa ınvestıtsııa salý arqyly anaǵurlym ınklıýzıvti ári zamanaýı tsıfrlyq ekonomıkany qurýǵa kiristi. Elderimiz Team Europe Initiative on Digital Connectivity («Eýropa komandasynyń» tsıfrlyq baılanys jónindegi bastamasy) aıasynda jerserik arqyly ınternetke qaýipsiz qosylý, ásirese, aýyldar men shalǵaı eldi mekenderdiń ǵalamtorǵa qol jetkizýi boıynsha áriptestikti jolǵa qoıdy. Sondaı-aq Ortalyq Azııa men Eýropa Odaǵynyń alǵashqy ınnovatsııalyq kampýsyn Astana Hub aýmaǵynda ornalastyrý múmkindigin qarastyrýǵa kelistik. Bul startaptar, tehnologııa zertteýshileri jáne tsıfrlyq sala kásipkerleri bas qosatyn alań bolmaq. Qazaqstan Eýropa Odaǵynyń dúnıe júzinde qaýipsiz ári senimdi tsıfrlyq baılanysty qamtamasyz etýge baǵyttalǵan Horizon Europe baǵdarlamasy men Global Gateway tujyrymdamasyn joǵary baǵalaıdy. Biz osy úderiske belsendi atsalysqanymyzdy maqtan tutamyz, — dedi Memleket basshysy.
Sondaı-aq uzaqmerzimdi ári tabysty seriktestik úshin adamdar arasyndaǵy baılanysty nyǵaıtýdyń mańyzy zor ekenine nazar aýdaryldy.
— Bilim, ǵylym jáne akademııalyq utqyrlyq salalarynda bizge udaıy qoldaý kórsetip kele jatqan Eýropa Odaǵyna rızashylyǵymdy bildiremin. Myńdaǵan qazaqstandyq jastar EO baǵdarlamalaryna qatysyp, sonyń ishinde Erasmus+ aıasynda bilim alyp jatyr. Eýropa Odaǵy osyndaı baılanystardy odan ári keńeıtýge beıil. Biz muny joǵary baǵalaımyz. Qazaqstan ýnıversıtetter arasyndaǵy seriktestikti tereńdetý, birlesken baǵdarlamalardy iske asyrý jáne biliktilik deńgeıin ózara moıyndaý arqyly joǵary bilim salasyndaǵy yntymaqtastyqty nyǵaıtýǵa ázir. Sonymen qatar azamattarymyz úshin vızalyq rásimderdi jeńildetý boıynsha Eýropa Odaǵyndaǵy seriktestermen yqpaldastyq jalǵasady dep úmittenemiz. Ózara barys-kelisti ońtaılandyrý bilim, ǵylym jáne mádenıet salalaryndaǵy baılanystarymyzdy keńeıtýge, iskerlik belsendilikti jandandyrýǵa oń septigin tıgizetinine senimdimin, — dedi Qasym-Jomart Toqaev.
Osyǵan deıin Toqaev Eýropalyq Keńes Prezıdentin І dárejeli «Dostyq» ordenimen marapattaǵanyn jazǵanbyz.
Sondaı-aq, Memleket basshysy Eýropalyq Keńes Prezıdenti Antonıý Koshtamen kelissóz júrgizdi.