Prezıdent jańa Ata Zań jobasy boıynsha usynystardy muqııat qaraýdy tapsyrdy

ASTANA. KAZINFORM — Prezıdent Konstıtýtsııalyq komıssııa jetekshilerimen jumys keńesin ótkizdi, dep habarlaıdy Aqordanyń baspasóz qyzmeti.

Qasym-Jomart Toqaev Konstıtýtsııalyq komıssııa tóraǵasy — Konstıtýtsııalyq sot tóraǵasy Elvıra Ázimovany, Konstıtýtsııalyq komıssııa tóraǵasynyń orynbasary — Memlekettik keńesshi Erlan Qarındi jáne Konstıtýtsııalyq komıssııa múshesi — Prezıdenttiń quqyqtyq máseleler jónindegi kómekshisi Erjan Jıenbaevty qabyldady.

Memleket basshysyna Komıssııanyń jańa Konstıtýtsııa jobasy boıynsha buǵan deıin atqarǵan jumysy týraly málimet berildi.

Elvıra Ázimova halyq qaraýyna usynylǵan jańa Ata Zań jobasy jóninde baıandady. Onyń aıtýynsha, eGov jáne e-Otinish portalyna jurtshylyq tarapynan kelip túsken oı-pikirler sany 4 myńnan asqan. Azamattar jobany búgingi talap-tilekter men qoǵam múddesine saı keledi dep tanıdy. Saıası partııalar, respýblıkalyq jáne óńirlik qoǵamdyq uıymdar jańa Konstıtýtsııa qabyldaý jónindegi bastamaǵa qoldaý bildirdi.

Prezıdent Konstıtýtsııalyq komıssııa jumysy ashyq formatta jalǵasa berýge tıis ekenin atap ótti. Bul azamattardyń talqylaý barysynan habardar bolyp, joba mazmunymen egjeı-tegjeıli tanysýyna múmkindik beredi.

— Qasym-Jomart Toqaev sarapshylar men qoǵam ókilderi joldaǵan usynystardyń barlyǵyn jiti taldaýdy tapsyrdy. Elvıra Ázimova Konstıtýtsııalyq komıssııa músheleri jańa Konstıtýtsııa jobasynyń jekelegen baptary men tarmaqtaryn redaktsııalap jatqanyn aıtty. Komıssııanyń kezekti otyrystary erteń, ıaǵnı 7 aqpanda jáne kelesi aptada ótedi, — delingen habarlamada.

Osyǵan deıin Memleket basshysy Qorǵanys mınıstriniń orynbasarlaryn qabyldaǵanyn jazǵan edik.