Prezıdent: Konstıtýtsııa uzaq jyl boıy halyq ıgiligine qyzmet etedi
ASTANA. KAZINFORM — Memleket basshysy Qasym-Jomart Toqaev BAQ ókilderin marapattaý rásiminde jańa Konstıtýtsııany halqymyzdyń temirqazyǵy, ádiletti qoǵamnyń berik negizi jáne eldiń ornyqty damýynyń kepili dep atady.
— Negizgi qujatta elimizdiń Egemendigi men Táýelsizdigin qorǵaý, azamattardyń quqyqtary men bostandyqtaryn múltiksiz saqtaý, Zań men tártip ústemdigin qamtamasyz etý, jalpyulttyq birlik pen tatýlyqty nyǵaıtý basty qaǵıdattar retinde bekitildi. Konstıtýtsııada bilim men ǵylymdy, ınnovatsııany jáne adam kapıtalyn damytý strategııalyq baǵyt dep tanyldy. Sonymen qatar halyqtyń ál-aýqatyn arttyrýǵa, jasampaz otanshyldyq pen eńbeksúıgishtik ıdeıasyn dáripteýge, tabıǵatqa qamqorlyqpen qaraýǵa basymdyq berildi, — dedi Prezıdent.
Birneshe kúnnen soń, ıaǵnı 1 shildede Konstıtýtsııamyz zańdy kúshine enedi. Qazaqstan túbegeıli jańa dáýirge qadam basady.
— Konstıtýtsııa elimizdiń saıası jáne ıdeologııalyq arqaýy retinde uzaq jyl boıy halyq ıgiligine qyzmet eterine senemin. Qazaqstannyń damyǵan jáne ozyq el bolǵany ózimizge ǵana kerek. Bizdiń basqa elimiz joq. Sondyqtan qazirgi jáne keler urpaqtyń aldynda asa mańyzdy mindet tur. Bul — Otanymyzdy ónegeli memleketke aınaldyrý. Nemerelerimiz aǵymdaǵy keıbir olqylyqtarymyzdy, qatelerimizdi keshirýi múmkin. Sebebi ár jumys, ár eńbek qatesiz bolmaıdy. Biraq Egemendigimizge zııan keltirip, Táýelsizdigimizdi qorǵaı almasaq, olar bizdi eshqashan keshirmeıdi. Óıtkeni Táýelsizdik — bárinen qymbat qasterli qundylyq. Al Táýelsizdikti saqtap, elimizdi odan ári damytý úshin eń aldymen qoǵamymyzda tatýlyq pen turaqtylyq bolýy qajet. Onsyz eshteńe bolmaıtyny aıdan anyq, — dedi Qasym-Jomart Toqaev.
Sonymen birge, Prezıdent memleketimizdiń tuǵyry — ádilettilik ekenin basa aıtty.
— Bul uǵymnyń masyldyqqa, selqostyqqa eshqandaı qatysy joq. Kerisinshe, ádilettilik, bul — eńbekqorlyq uǵymyna jaqyn túsinik, — dedi Qasym-Jomart Toqaev.
Aıta keteıik, 28 maýsym — BAQ ókilderiniń kásibı merekesi qarsańynda Memleket basshysy Qasym-Jomart Toqaev jýrnalıster qaýymyn quttyqtady.
Eske sala ketsek, 2019 jyly Prezıdent Qasym-Jomart Toqaev jýrnalısterdiń kásibı merekesin bekitý jóninde Úkimetke tapsyrma bergen bolatyn. Úkimettiń tıisti Qaýlysy jarııalanyp, 28 maýsym kúni Buqaralyq aqparat quraldary qyzmetkerleriniń merekesi atalyp ótetin boldy.
