Prezıdent: Qomaqty qarjy bólinip jatqanyna qaramastan, agrarlyq ǵylymnyń qaıtarymy áli de tómen

ASTANA. KAZINFORM — Memleket basshysy Qasym-Jomart Toqaev aýyl sharýashylyǵy ǵylymyn damytýdyń naqty jospary qajettigin málim etti. 

— Qoldanbaly aýyl sharýashylyǵy ǵylymyn jedel órkendetpeıinshe, agroónerkásip keshenin uzaq ýaqyt boıy qarqyndy damytý múmkin emes. Biraq, bıýdjetten qomaqty qarjy bólinip jatqanyna qaramastan, agrarlyq ǵylymnyń qaıtarymy áli de tómen bolyp otyr. Ǵylymı ázirlemelerdi kommertsııalandyrý deńgeıi 17 paıyzdan aspaıdy. Al, tıisti oqý oryndaryn bitirgen túlekterdiń 40 paıyzy ǵana osy salaǵa jumys isteýge barady. Agroǵylym men «jerdegi tirshiliktiń» arasynda alshaqtyq bar, — dedi Qasym-Jomart Toqaev Qazaqstan halqyna Joldaýynda.

Osy oraıda Memleket basshysy ulttyq agrarlyq ǵylymı-bilim berý ortalyǵyn agrotehnologııa haby retinde qaıta qurýdy tapsyrǵanyn aıtty.

— Aýyl sharýashylyǵy ǵylymyn damytýdyń naqty jospary qajet. Bul qujat tsıfrlyq tehnologııalardy qoldanýǵa jáne osy salanyń ónimdiligin edáýir arttyrýǵa arnalǵan jospar bolýǵa tıis. Veterınarııa men fıtopatologııanyń kenjelep qalýy agroónerkásip kesheniniń básekege qabiletin aıtarlyqtaı shektep otyr. Osy máselege aıryqsha nazar aýdarǵan jón, — dep tolyqtyrdy Prezıdent.

Buǵan deıin Qasym-Jomart Toqaev Úkimet Eýrazııa aýmaǵyndaǵy saýda-sattyqtyń ádil jaǵdaıda jasalýyn naqty dálelmen talap etýge mindetti ekenin eskertti.  

Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.

Kazinform saıty tikeleı efırmen qatar, jazbasha translıatsııa da jasaıdy.

Sondaı-aq Joldaý mátinin agenttiktiń telegram arnasynan oqýǵa bolady.