Prezıdent kólik-logıstıka salasyna jasandy ıntellektini engizýdi usyndy
ASTANA. KAZINFORM – Memleket basshysy Keńestiń kelesi otyrysynda kólik-logıstıka salasyna jasandy ıntellektini engizý máselesin talqylaýdy usyndy, dep habarlaıdy Aqorda.
Prezıdenttiń paıymdaýynsha, joǵary sapaly óndiristik málimetter bolmasa, jasandy ıntellektini tıimdi qoldaný múmkin emes.
Ol kásiporyndar óndiristik málimetterdiń mol qoryn jınaqtaǵanymen, sapasy árkelki ári shashyrańqy kúıde qalyp otyrǵanyn aıtty. Mundaı derekterdiń kóbi jasandy ıntellekt júıelerinde qoldanýǵa jaramsyz.
– Keńestiń aldyńǵy otyrysynda derekterge baǵdarlanǵan modelge kóshý jáne salalyq málimetter qoryn jasaqtaý qajet ekenin aıtqanmyn. Endi atalǵan jumysty óndiriste jalǵastyrý kerek. Bizge biryńǵaı sapa standartyna saı, ózara baılanysty jáne qaýipsiz paıdalanýǵa bolatyn salalyq óndiristik málimetter qajet. Otandyq zertteýshiler men baǵdarlama ázirleýshiler oǵan kedergisiz qol jetkizýge tıis. Árıne, kommertsııalyq qupııa, strategııalyq aqparat pen asa mańyzdy málimetter senimdi túrde qorǵalady. Úkimetke bıznes-qaýymdastyqpen birlesip, salalyq óndiristik málimetter bazasyn qalyptastyrýdyń ortaq tásilderin ázirleý mindeti júkteledi. Otandyq tehnologııalyq sheshimderdi daıyndaǵanda atalǵan derekterdi is júzinde qoldanýǵa basymdyq berilgeni jón, – dedi Qasym-Jomart Toqaev.
Memleket basshysy Qazaqstan jasandy ıntellektini damytýǵa berik negiz qalaǵanyn aıtty. Endigi mindet – osy áleýetti ekonomıkalyq ıgilikke aınaldyrý.
– Jasandy ıntellekt el ındýstrııasyn damytatyn qural bolýǵa tıis. Buǵan Qazaqstannyń múmkindigi jetedi. Atalǵan jumysty strategııalyq máni zor sektorlarda kúsheıte túsý kerek. Osy oraıda Keńestiń kelesi otyrysynda kólik-logıstıka salasyna jasandy ıntellektini engizý máselesin talqylaýdy usynamyn. Bul sektordy odan ári jańǵyrtý onyń áleýeti men tıimdiligin arttyryp, Qazaqstannyń tranzıttik múmkindikterin nyǵaıta túsedi, – dedi Prezıdent.
Aıta keteıik, Toqaev óndiriste JI qoldanýdyń biryńǵaı mehanızmin qurýdy tapsyrdy.
