Prezıdent Kókshetaý qalasynyń 2050 jylǵa deıingi Bas josparymen tanysty

ASTANA. KAZINFORM -  Qasym-Jomart Toqaevqa Bas jospar aıasynda jylý elektr ortalyǵy, oblystyq kópbeıindi aýrýhana, Azamattyq qorǵanys akademııasy jáne kópfýnktsıonaldy sport kesheni salynyp jatqany jóninde baıandaldy. Budan bólek, alpysqa jýyq ónerkásip kásipornyna eseptelgen ındýstrııalyq aımaqtyń negizi qalanyp jatyr. Bul týraly Aqordanyń baspasóz qyzmeti habarlady.

Oblys ortalyǵynyń aýmaǵy 7 myń gektarǵa ulǵaıady. Bas jospardaǵy erekshe nysannyń biri – Qopa kóliniń jaǵasynda boı kóteretin zamanaýı iskerlik ortalyq. Onda turǵyn úı keshenderi, bıznes jáne saýda ortalyqtary, áleýmettik nysandar men qoǵamdyq keńistikter ornalasady.

Mejeli ýaqytqa deıin qala halqynyń sany 500 myńǵa jetedi dep josparlanyp otyr. Turǵyndarǵa qolaıly jaǵdaı jasaý úshin jańa qurylys alańdary jáne renovatsııa baǵdarlamasy aıasynda 10 mıllıon sharshy metrge jýyq turǵyn úı paıdalanýǵa berilmek.

Prezıdentke Kókshetaý qalasynda tabysty iske asyrylyp jatqan bes jyldyq renovatsııa baǵdarlamasy jóninde málimet berildi.

Jobanyń maqsaty – apatty úılerdiń turǵyndaryn zamanaýı, jaıly ári qýat únemdeıtin páterlerge kóshirý, sondaı-aq ınjenerlik jelilerdi, aýlalar men qoǵamdyq keńistikterdi keshendi túrde jańǵyrtý. Atalǵan baǵdarlamanyń operatory – Kokshe áleýmettik-kásipkerlik korporatsııasy.

Qazirgi ýaqytta 13 eski úı buzylyp, ornyna 2 toǵyz qabatty jáne 4 bes qabatty kóppáterli úı salyndy. Jańa baspanaǵa 365 otbasy qonystandy.

2029 jylǵa deıin 175 eski úıdi buzý josparlanyp otyr. Onyń ornyna 3500 páterge eseptelgen 35 zamanaýı turǵyn úı boı kóteredi. Nátıjesinde 11 myńǵa jýyq adam jańa qonysqa kóshedi.

Memleket basshysy jańa stadıondy keminde 10 myń kórermenge laıyqtap salý jóninde tapsyrma berdi.

Aıta keteıik, Memleket basshysy Aqmola oblysynyń Zerendi aýdanynda aımaq sharýalarymen egin jınaý naýqanyna arnalǵan keńes ótkizdi.