Prezıdent qoǵamǵa qajetti reformanyń úshinshi paketin usyndy - saıasattanýshy

ALMATY. QazAqparat - Saıasattanýshy Baýyrjan Serikbaev Memleket basshysy Qasym-Jomart Toqaevtyń VII shaqyrylymdaǵy Parlamenttiń birinshi sessııasynda aıtqan usynystaryna qatysty óz oıyn bildirdi, dep habarlaıdy QazAqparat tilshisi.

«Prezıdent búgin qoǵamǵa qajetti reformanyń úshinshi paketin usyndy desek bolady. Mysalǵa partııalardyń Parlamentke ótý shegin 7-den 5%-ǵa túsirý - eldegi saıası partııalar arasyndaǵy básekeni kúsheıtedi dep esepteımin. «Aýyl» men «Adal» partııasy osy saılaýda óte almaı qaldy. Olar úshin bul jańa motıvatsııa bolady dep senemin», - deıdi Baýyrjan Serikbaev.

Sonymen qatar, saıasattanýshy aýyl ákimderiniń saılaýy úlken jaýapkershilikti talap etetinin atap ótti.

«2021 jyly aýyl ákimderin saılaý protsesi iske qosylady. Bul da eldegi ákimderdiń halyq aldyndaǵy jaýapkershiligin arttyrady. Bári sátti iske asatyn bolsa, bul Qazaqstandy demokratııalandyrýdy, halyqtyń saılaýǵa degen belsendiligin arttyrady. Prezıdenttiń búgingi usynystary, reformalar paketi - qoǵamnyń suranysyna saı kelgen bastamalar dep esepteımin»,- deıdi saıasattanýshy.

Eske salsaq, búgin jetinshi shaqyrylǵan Parlamenttiń alǵashqy sessııasy ótti. Onda QR Prezıdenti Qasym-Jomart Toqaev úndeý jasady.