Prezıdent qoǵamdyq keńester týraly zańnamany jetildirýdi tapsyrdy
ASTANA. KAZINFORM — Qazaqstanda qoǵamdyq baqylaý biryńǵaı júıe boıynsha júrgizilmeıdi, ony baǵalaýdyń ortaq ólshemderi de ázirlenbegen. Memleket basshysy Qasym-Jomart Toqaev bul jumysty júıelep, qoǵamdyq baqylaý tetikterin retke keltirýdi Qazaqstan Halyq Keńesiniń negizgi baǵyttarynyń biri dep atady.
Prezıdenttiń aıtýynsha, máslıhattar Parlamentpen tyǵyz baılanysta jumys isteıdi. Olar aımaqtaǵy máselelerdi ortalyqqa jetkizip, zańdardy jetildirýge qatysty óz usynystaryn turaqty túrde berip otyrady.
— Biraq qoǵamdyq keńesterde mundaı baılanys ta, tájirıbe de bolmaǵan. Sondyqtan biz alǵash ret Halyq Keńesi arqyly osy jumysty qolǵa alamyz. Eldik máseleler talqylanǵan kezde qoǵamdyq keńesterdiń múmkindikterin tolyq paıdalaný qajet. Osy oraıda qoǵamdyq keńester týraly zańnamany jetildirý kerek, — dedi Q. Toqaev Qazaqstan Halyq Keńesiniń birinshi sessııasynda.
Halyq Keńesi qoǵamdyq keńestermen turaqty baılanysty jolǵa qoıyp, olarǵa arnalǵan jan-jaqty qoldaý sharalaryn qarastyrýy qajet.
— Úkimetke Qazaqstan Halyq Keńesimen birlesip, mundaı qurylymdardyń kásibı áleýetin arttyrý joldaryn pysyqtaýdy tapsyramyn. Taǵy bir mańyzdy másele — qoǵamdyq baqylaýdy júzege asyrý. Bul — Keńes qyzmetiniń negizgi baǵytynyń biri. Degenmen qazir elimizde qoǵamdyq baqylaýdy júrgizýdiń biryńǵaı jáne naqty tártibi nemese birtutas júıesi joq. Bul jumysty baǵalaýdyń ortaq ólshemderi de ázirlenbegen. Halyq Keńesi qoǵamdyq baqylaý salasyn júıelep, ony retke keltirýge atsalysýy kerek. Bul jumysqa táýelsiz sarapshylar men kásibı mamandardy kóbirek tartqan jón, — dedi Memleket basshysy.
Buǵan deıin Prezıdent 1 jylda eldiń saıası júıesi men memlekettik basqarýyna eleýli ózgeris ákelgen aýqymdy reformalar júzege asqanyn aıtqan edi.
Qasym-Jomart Toqaev Qazaqstannyń 7 jyldaǵy negizgi kórsetkishterin atady.
Sondaı-aq Halyq Keńesi men Quryltaı bir-biriniń jumysyna aralaspaıdy.
