Prezıdent qoǵamdyq qaýipsizdikti qamtamasyz etýdi kúsheıtýdi tapsyrdy
ASTANA. KAZINFORM — Memleket basshysy Іshki ister mınıstri Erjan Sádenovti qabyldady. Bul týraly Aqordanyń baspasóz qyzmeti habarlady.
Prezıdentke eldegi krımınogendik ahýal jáne qoǵamdyq qaýipsizdik pen quqyqtyq tártipti qamtamasyz etý jónindegi tapsyrmalarynyń oryndalý barysy týraly baıandaldy.
Erjan Sádenov bıylǵy toǵyz aıdyń qorytyndysy boıynsha qylmys deńgeıi 15 paıyzǵa tómendegeni jóninde málimet berdi.
Naqty aıtqanda, ótken jylmen salystyrǵanda azaıǵan qylmys sany 11 myńnan asady. Qylmystyń asa aýyr túrleri, sondaı-aq qoǵamdyq oryndarda, kóshelerde, otbasylyq-turmystyq salada, kámeletke tolmaǵandar men buryn sottalǵandar arasynda quqyq buzýshylyqtar kemigen.
Mınıstr ótken jyldary 2,5 myńnan astam qylmys ashylǵany aıtty.
Krımınalıstıkanyń zamanaýı quraldary, sonyń ishinde DNQ zertteýleri kóp jyl buryn jasalǵan qylmystarǵa qatysy bar adamdardy anyqtaýǵa múmkindik berip otyr.
Ol qoǵamda quqyqtyq tártipti buzýǵa tózbeýshilik daǵdysy ornyǵyp kele jatqanyn baıandady.
Jurtshylyq polıtsııanyń Zań men tártipti júzege asyrýyna belsendi túrde kómektesedi. Jyl basynan beri azamattardyń, volonterler men qoǵamdyq kómekshilerdiń aqparaty boıynsha 12 myńnan asa ákimshilik quqyq buzýshylyqtyń joly kesilip, 357 qylmys ashyldy.
Jazanyń bultartpastyǵyn qamtamasyz etýge sheteldik quqyq qorǵaý organdarymen ózara is-qımyl yqpal etip keledi. Іzdeýde júrgen 1039 adam tabylyp, syrt elderde boı tasalap júrgen 154 adam ustaldy. Shet memleketterdiń suraýy boıynsha Qazaqstan aýmaǵynda 537 qylmysker quryqtaldy.
Іshki ister mınıstrligi tergep jatqan qylmystyq ister boıynsha jyl basynan beri 49 mıllıard teńge qaıtarylǵany jóninde aıtty.
Bul ótken jyldyń osy kezeńimen salystyrǵanda 22,5 paıyzǵa kóp.
Internet-alaıaqtyqtan zardap shekken azamattarǵa 6,5 mıllıard teńgeden astam qarajat qaıtarylǵan. Mundaı qylmystyń sany 21 paıyzǵa azaıdy. Olardyń jolyn kesý maqsatynda 8,7 myń alaıaqtyq jáne fıshıngtik saıt, sondaı-aq 187 mıllıon alaıaqtyq qońyraý buǵattaldy.
Erjan Sádenov qoǵamdyq qaýipsizdikti qamtamasyz etýdiń tsıfrlyq tetikterin damytý jóninde aqparat berdi.
Beınebaqylaý jelisiniń kómegimen 2,2 myńnan astam adam anyqtalyp, ustalǵan.
Tsıfrlyq sheshimder jol qaýipsizdigin qamtamasyz etý úshin de belsendi qoldanylyp jatyr.
Bul sharalar profılaktıkalyq jumysty kúsheıtip, jol-kólik oqıǵalarynyń sanyn 5 paıyzǵa tómendetýge múmkindik berdi. Sonymen qatar qaza tapqandar sany 16 paıyzǵa, jaraqat alǵandar 7 paıyzǵa azaıǵan.
Memleket basshysy eldegi quqyqtyq tártip pen qoǵamdyq qaýipsizdik deńgeıin odan ári arttyrýǵa baǵyttalǵan birqatar tapsyrma berdi.
Aıta ketelik Toqaev Emomalı Rahmonmen sóılesip, qazaq-tájik baılanysyn keńeıtýdiń mańyzyn aıtqan edi.
