Prezıdent qoǵamda qyzý talqylanyp jatqan salyq reformasyna qatysty pikirin aıtty

BÝRABAI. KAZINFORM – Sondyqtan reformanyń mánin adamǵa túsinikti tilmen jetkizý kerek. Bul týraly Býrabaıda ótip jatqan Ulttyq quryltaıdyń IV otyrysynda Memleket basshysy Qasym-Jomart Toqaev málim etti.

- Endi birqatar máselege arnaıy toqtalyp ótkim keledi. Eń aldymen qoǵamda qyzý talqylanyp jatqan salyq reformasyna qatysty pikirimdi aıtaıyn. Salyq júıesi, bul – búkil memlekettik júıeniń tiregi. Bıýdjette qarjy bolmasa, memleket óz mindetin tolyq atqara almaıdy, áleýmettik mindettemeler de oryndalmaıdy. Bul týraly jańa ǵana belgili ekonomıst Jaqsybek Qulekeev jaqsy aıtyp ótti. Sondaı-aq Quryltaı músheleri Qaıyrbek Arystanbekov, Marat Bashımov, Erlan Saırov, Rasýl Rysmambetov jáne Murat Ábenov salyq-bıýdjet máselesine qatysty oryndy pikir bildirdi, - dedi Qasym-Jomart Toqaev.

Prezıdenttiń aıtýynsha, elimiz úshin asa qajet sharalardyń mán-mańyzyn halyqqa egjeı-tegjeıli túsindirý kerek.

- Jurttyń bári ekonomıst nemese qarjyger emes. Memlekettiń qandaı sharany ne úshin qolǵa alyp jatqanyn bári birdeı túsine bermeýi múmkin. Sondyqtan reformanyń mánin adamǵa túsinikti tilmen jetkizý kerek, - dedi Memleket basshysy.

Budan buryn habarlanǵandaı, Býrabaıda Prezıdent Qasym-Jomart Toqaevtyń qatysýymen Ulttyq quryltaıdyń IV otyrysy bastaldy.