Prezıdent qoǵam densaýlyǵyn nyǵaıtýǵa qatysty zań jobasynyń mańyzy týraly aıtty
«Mańyzdy máselelerdiń biri ózin-ózi jumyspen qamtyǵandardy áleýmettik qamsyzdandyrý júıesine tartýǵa qatysty. Kiristerinen eshqandaı aýdarymdar jasamaıtyn halyqtyń bóligi bar, sáıkesinshe, olar zeınetaqy júıesimen ári áleýmettik qoldaý sharalarymen tolyqqandy qamtylmaǵan. Osyǵan baılanysty qajetti zańnamalyq ózgerister daıarlandy. Ózin-ózi jumyspen qamtyǵandardy tirkeýdi jeńildetý úshin biryńǵaı jıyntyq tólemin engizý usynylady. Bul tólem ózin-ózi jumyspen qamtyǵandarǵa medıtsınalyq, áleýmettik saqtandyrý, sondaı-aq zeınetaqylyq qamtamasyz etý júıelerine qatysýǵa múmkindik beredi. Osy ózgeristerdi bıyldyń sońyna deıin qabyldaý qajet», - dedi Elbasy.
Osy oraıda Memleket basshysy bul másele Mindetti áleýmettik medıtsınalyq saqtandyrýǵa kóshý turǵysynda aıryqsha ózekti ekenin atap ótti.
Budan bólek Prezıdent medıtsınalyq kómektiń kepildendirilgen kóleminiń jańa modelin engizýdi, qoǵamdyq densaýlyqty qorǵaý men medıtsınalyq uıymdarda korporatıvtik basqarý júıesin jetildirýdi qarastyratyn zań jobasy ázirlengenin eske salyp ótti.
«Bul qujat Parlament qaraýyna engizilgen bolatyn. Bul rette ony qarastyrýdy uzaqqa sozbaýdy suraımyn»,- dedi N. Nazarbaev.
Aıta keteıik, búgin Astanada Memleket basshysy Nursultan Nazarbaevtyń qatysýymen QR Parlamenti palatalarynyń birlesken otyrysy ótip jatyr.
Jıyn barysynda Prezıdent 2019 jyldyń 1 qańtarynan bastap jalaqysy tómen azamattardyń tabys salyǵy 10 esege azaıatyndyǵyn aıtty.
Sondaı-aq Elbasy quzyrly organ ókilderine turǵyn úı-kommýnaldyq sharýashylyq salasynda qalyptasqan máselelerdi sheshýdi tapsyrdy.
Memleket basshysy Úkimet pen mınıstrlikter Túrkistan oblysynyń qalyptasýyna laıyqty nazar aýdarý qajettigin eskertti jáne kelesi Joldaýda qandaı máseleler kóteriletini jóninde de sóz qozǵady.
