Prezıdent Qyzylordada salynyp jatqan JEO-ny merziminde iske qosýdy tapsyrdy

Memleket basshysy Qasym-Jomart Toqaevqa Qyzylorda qalasynyń jańa jylý elektr ortalyǵynyń jobasy tanystyryldy. Kazinform agenttigi bul týraly Aqordaǵa silteme jasap habarlaıdy.

Málimetke súıensek, byltyr Energetıka mınıstrligi túrkııalyq «Aksa Enerji Uretim AS» kompanııasymen Qyzylorda qalasynda jańa bý-gaz qondyrǵysyn ornatý jóninde kelisimshartqa qol qoıdy. Sheteldik ınvestıtsııa esebinen salynyp jatqan jańa JEO 240MVt elektr qýatyn jáne saǵatyna 277 jylý qýatyn óndire alady. Jobanyń boljamdy quny – 215 mıllıard teńge.

Oblys ákimi Nurlybek Nálibaevtiń aıtýynsha, qazir qurylysqa daıyndyq jumystary qyzý júrip jatyr. 2025 jyldyń sońyna deıin paıdalanýǵa beriletin JEO qalanyń jylý jáne elektr qajettiligin tolyq qamtamasyz etip qana qoımaı, artylǵan elektr energııasyn basqa óńirlerge satýǵa múmkindik beredi.

Qazirgi qoldanystaǵy jylý elektr ortalyǵy 1964 jyly salynǵan. Birneshe ret kúrdeli jóndeý júrgizilgenine qaramastan, strategııalyq nysannyń negizgi jáne qosalqy qondyrǵylarynyń tozý deńgeıi 90 paıyzǵa jetken. Sondaı-aq qaladaǵy uzyndyǵy 207,7 shaqyrym bolatyn jylý jelisiniń jartysyna jýyǵy jańartýdy qajet etedi.

Memleket basshysy elimizdiń energetıkalyq qaýipsizdigin kúsheıtý turǵysynan bul jobanyń mańyzdy ekenin atap ótti.

Qasym-Jomart Toqaev Úkimet pen oblys ákimdigine jylý elektr ortalyǵyn belgilengen merzimde paıdalanýǵa berýdi tapsyrdy.

Eske salaıyq, búgin tańerteń Memleket basshysy Qyzylorda oblysyna jumys saparymen bardy.

Qasym-Jomart Toqaevtyń óńirge sapary Syrdarııa aýdany Naǵı Іlııasov aýylynyń tynys-tirshiligimen tanysýdan bastaldy.

Odan ári Prezıdent byltyr boı kótergen «Eńbek alleıasynda» eńbek adamdarymen júzdesti.

Sondaı-aq «Qorqyt ata» áýejaıynyń jańa termınalymen, «Qyzylorda – Jezqazǵan» avtojolynyń qurylys barysymen tanysty.