Prezıdent Qyzylorda oblysyndaǵy Óner ortalyǵyn aralap kórdi
ASTANA. KAZINFORM - Prezıdent Qyzylorda oblysyndaǵy Óner ortalyǵyna bardy, dep habarlaıdy Aqordanyń baspasóz qyzmeti.
Memleket basshysy kórermen zalyn aralap kórip, oblystyq sımfonııalyq orkestrdiń daıyndyq barysyn tamashalady.
Myń orynǵa arnalǵan kóp fýnktsıonaldy Óner ortalyǵy byltyr ashylǵan. Keń ári zamanaýı úlgidegi ǵımarat qurylysyna 3,7 mıllıard teńge jumsalǵan. Munda kontsertter, shyǵarmashylyq keshteri men túrli qoǵamdyq is-sharalar uıymdastyrylady. Ortalyqta birneshe shyǵarmashylyq ujym ornalasqan.
Qasym-Jomart Toqaevqa 2022 jyldan beri oblysta 18 mádenıet nysany ashylǵany týraly málimet berildi. Sonyń ishinde 7 zamanaýı «Rýhanııat» ortalyǵy, mýzykalyq kolledjdiń jańa ǵımaraty, oblystyq tarıhı-ólketaný mýzeıi men shalǵaı eldi mekenderde mádenıet úıleri salyndy.
Ákimdik mádenıet salasy qyzmetkerlerin baspanamen qamtý, mamandardyń biliktiligin arttyrý jáne ozyq tájirıbeni engizý baǵyttary boıynsha júıeli jumys júrgizip jatyr.
Osyǵan deıin Prezıdent Nurlybek Nálibaevqa ınvestıtsııalyq klımatty jaqsartý baǵytynda birqatar tapsyrma bergen bolatyn.
