Prezıdent: Qytaı bıznesiniń ókilderi elimizden senimdi seriktester taba alady
ASTANA. KAZINFORM – Memleket basshysy qarjy sektoryndaǵy qazaq-qytaı iskerlik baılanysyn nyǵaıtýǵa shaqyrdy.
– «Astana» halyqaralyq qarjy ortalyǵy Qazaqstandaǵy tartymdy ınvestıtsııalyq ortanyń berik negizi sanalady. Bul ortalyqta kóptegen eldiń 4 200-den astam kompanııasy jumys istep jatyr, solardyń qatarynda 850 qytaı kompanııasy bar. Qazaqstan damý banki Qytaıdyń jetekshi qarjy ınstıtýttarymen yntymaqtastyq aıasynda eýrooblıgatsııany Qytaı ıýanymen (Dim Sum bonds) ornalastyra bastady. Bul Ortalyq Azııadaǵy dál osyndaı tuńǵysh kelisim boldy. Osy óte mańyzdy qadam halyqaralyq ınvestorlardyń Qazaqstannyń qarjy júıesine senimin nyǵaıta tústi, – dedi Memleket basshysy
Qasym-Jomart Toqaev elimizde aýqymdy ınvestıtsııa tartýǵa barynsha qolaıly jaǵdaı jasalǵanyn, iri jobalardy júzege asyrýǵa tolyq múmkindik bar ekenin málimdedi.
– Qytaı bıznesiniń ókilderi elimizden senimdi seriktester taba alady. Sonymen birge olar aımaqtaǵy jáne álemdegi abyroı-bedelin kúsheıtip, ósip-órkendeýdiń jańa kózderin asha alady. Bul másele Qazaqstan Úkimetiniń erekshe baqylaýynda bolady. Qurmetti qytaılyq bıznes ókilderi, Sizder Qazaqstan men Qytaı arasyndaǵy yqpaldastyqty odan ári nyǵaıtý isinde óte mańyzdy ról atqarasyzdar. Bul qol jetkizgen ýaǵdalastyqtar ekonomıkalyq baılanysty kúsheıtýge yqpal etip, elderimizdiń strategııalyq seriktestigine tyń serpin bermek. Men buǵan kámil senemin. Sebebi bul maqsat-mindetter bizdiń elimizdiń ulttyq múddesine saı keledi. Sondyqtan tıisti jobalardy iske asyrý barysy elimizdiń eń joǵary bıliginiń nazarynda bolady, – dedi Prezıdent.
Jıynda QHR Memlekettik keńesiniń birinshi vıtse-premeri, QKP OK Saıası bıýrosy Turaqty komıtetiniń múshesi Dın Sıýesıan, QHR Halyqaralyq saýdaǵa yqpal etý komıtetiniń tóraǵasy Jen Hýnbın, CITIC Group kompanııasy dırektorlar keńesiniń tóraǵasy, Іskerlik keńestiń teń tóraǵasy Sı Gohýa, «Samuryq-Qazyna» aktsıonerlik qoǵamynyń basqarma tóraǵasy, Іskerlik keńestiń teń tóraǵasy Nurlan Jaqypov sóz sóıledi.
Aıta keteıik, Qasym-Jomart Toqaev Qytaıdyń Jasandy ıntellekt salasyndaǵy yntymaqtastyq jónindegi jahandyq uıym qurý bastamasyn qoldaıtynymyzdy aıtty.