Prezıdent kitaphanasynyń saıtynda 13 mln.-nan astam málimet saqtalady
ASTANA. QazAqparat - Jańadan ashylǵan Qazaqstan Respýblıkasynyń Tuńǵysh Prezıdenti - Elbasy kitaphanasynyń www.presidentlibrary.kz saıtyndaǵy elektrondy baza arqyly oqyrmandar 13 mln. 132 myń málimetke qol jetkize alady. Bul týraly búgin saıttyń tusaýkeser rásiminde kitaphananyń baspasóz hatshysy Oksana Loskýtova aıtty.
«Saıt arqyly Elbasy Kitaphanasynyń elektrondy kitaphanasymen tanysýǵa múmkindik bar. Ol eki bólikten - Memleket basshysynyń Jeke elektrondy kitaphanasynan jáne málimetterdiń elektrondy bazasynan turady. Elektrondy baza arqyly oqyrman 13 mln. 132 myń málimetke qol jetkize alady. Baǵyttary san-alýan: saıasat ǵylymdary, áleýmettik ǵylymdar, tarıh, ekonomıka, mádenıet, ádebıet, menedjment, geografııa jáne taǵy da basqa kóptegen salalar qamtylǵan. Saıtymyzǵa tirkelgen adam Dúnıejúzilik elektrondy kitaphanamen jáne elektrondy jýrnaldar kitaphanasymen jumys isteýge erekshe múmkindik alady», - dep atap ótti ol. Sonymen qatar, saıtqa tirkelgen qoldanýshy «Bultty qor-muraǵaty 20+» jobasymen (sensorly ekran) jumys isteýge múmkindik alady. Onda memleket basshysynyń qyzmetine baılanysty foto, beınemuraǵat bir júıege keltirilgen. «Saıttyń taǵy bir ereksheligi - Internet-televızııa. Onda Elbasy kitaphanasynda bolǵan sharalar beınematerıal, fılm túrinde júkteledi. Sonymen qatar ınternet-televızııa arqyly belgili bir sharany onlaın rejımde taratýǵa múmkindik bar», - deıdi O. Loskýtova. Sondaı-aq, kitaphana saıtynyń vırtýaldy týry arqyly qashyqtyqtan Memleket basshysynyń Jeke Kitaphanasynyń kontentimen, «Álemdi ózgertetin ıdeıalar» atty ınteraktıvti bilim berý ortalyǵymen jumys isteýge bolady.
