Prezıdent Qysqy Olımpıada men Paralımpıadaǵa qatysatyn sportshylarǵa Memlekettik týdy tapsyrdy
ASTANA. KAZINFORM — Qasym-Jomart Toqaev dúnıe júziniń eń myqty sportshylary baq synaıtyn Italııadaǵy XXV Qysqy Olımpıada oıyndary men XIV Qysqy Paralımpıadany aıryqsha mańyzdy oqıǵa dep atady.
– Olımpıada oıyndaryna 40-qa jýyq sportshymyz qatysady. Olar sporttyń 10 túrinen jarysqa túsedi. Ulttyq qurama músheleriniń jartysynan kóbi Olımpıadaǵa alǵash ret bara jatyr. Jahandyq báseke sizder úshin zor múmkindik ári úlken synaq bolmaq. Qysqy Olımpıadaǵa joldama alý úshin sportshylarymyz kóptegen belesten ótti. Túrli halyqaralyq jarysta tabysty óner kórsetip, 17 altyn, 31 kúmis jáne 21 qola medalǵa ıe boldy. Sonymen birge biz Paralımpıada oıyndarynda el abyroıyn qorǵaıtyn sportshylarymyzǵa zor senim artamyz. Paralımpıadashylardyń erekshe qulshynysy jáne myqty erik-jigeri kópke úlgi. Naýryz aıynyń basynda Italııada ótetin Paralımpıada oıyndaryna ázirge 10 lıtsenzııa aldyq. Lıtsenzııa sany áli de kóbeıýi múmkin, – dedi Prezıdent.
Memleket basshysy tórt jylda bir ótetin baıraqty básekege qazaqstandyq sportshylar tyńǵylyqty daıyndalǵanyna toqtalyp, Qysqy Olımpıada jáne Paralımpıada oıyndarynda shyn myqtylar kúsh synasatynyn aıtty.
– Árıne, sportta jeńisti boljaý múmkin emes. Biraq Sizder qatań irikteýlerden súrinbeı ótip, Qazaqstannyń olımpıadalyq quramasyna múshe boldyńyzdar. Osynyń ózi, Sizderdiń áleýetterińizdi, jeńiske degen umtylystaryńyzdy tanytady. Táýelsizdik alǵan ýaqyttan beri sportshylarymyz Qysqy Olımpıada oıyndarynda sheberlik tanytyp, birneshe márte jeńis tuǵyrynan kórine bildi. Vladımır Smırnov, Lıýdmıla Prokasheva, Elena Hrýstaleva, Denıs Ten, ıÝlııa Galysheva sııaqty Olımpıada júldegerleriniń esimderi otandyq sport tarıhyna altyn áriptermen jazyldy. Álemdik sporttaǵy iri arenalarda top jarǵan otandyq atletterdiń qurmetine talaı ret Ánuran shyrqalyp, elimizdiń Týy kókte jelbiredi. Aldaǵy ýaqytta da jarqyn jeńister kútip turǵanyna senimdimin. Jaqynda Ulttyq quryltaı otyrysynda atap ótkenimdeı, sporttaǵy jetistikter tutas elimizdiń mártebesin kóterip, jalpyulttyq birlikti jáne Qazaqstan Respýblıkasynyń qazirgi álemdegi bedelin nyǵaıtady, – dedi Qasym-Jomart Toqaev.
Prezıdent namysty qoldan bermegen sportshylarymyz talaı básekede top jaryp, elimizdiń mereıin asyryp, naǵyz jasampaz otanshyldyqtyń úlgisin kórsetip júrgenin atap ótti.
– Ár azamatymyzdyń jetistigi – Qazaqstannyń jetistigi. Ár sportshynyń abyroıy – barsha qazaqtyń bedeli. Jeńiske jetý úshin talap pen tabandylyq kerek. Sizder sheberlikterińizdi shyńdap, aıanbaı eńbek ettińizder. Sonyń arqasynda dúbirli dodaǵa qatysýǵa múmkindik aldyńyzdar. Olımpıada chempıony bolý – ár sportshynyń armany. Osy maqsatqa bir taban jaqyn tursyzdar. «El senimi – erge júk» deıdi halqymyz. Baptaryńyz jáne baqtaryńyz qatar shaýyp, júldemen kelesizder dep senemin. Barsha halqymyz Sizderge jankúıer, tilekshi bolady. Bárińizge sáttilik, jeńis tileımin! Kók Týymyz árdaıym bıikte jelbireı bersin! – dedi Memleket basshysy.
Qasym-Jomart Toqaev Qazaqstan Respýblıkasynyń Memlekettik týyn Ulttyq quramanyń músheleri Denıs Nıkısha men Aıaýlym Ámrenovaǵa jáne Qazaqstan paralımpıadalyq komandasynyń múshesi Erbol Hamıtovqa tabystady.
Aıta keteıik, Memleket basshysy Davosta birqatar kezdesý ótkizdi.