Prezıdent Qyrǵyzstan Shanhaı yntymaqtastyq uıymyna tabysty tóraǵalyq etkenin aıryqsha atap ótti
BІShKEK. KAZINFORM — Memleket basshysy qol jetken jetistikterdi alǵa tartyp, «Shanhaı ondyǵyna» kiretin elderdiń bári úshin aıryqsha mańyzǵa ıe basty baǵyttarǵa toqtaldy. Bul týraly Aqordanyń baspasóz qyzmeti habarlady.
– Qazaqstan qyrǵyz aǵaıyndarymyz ben seriktesterimizdiń Uıym birligin nyǵaıtý jáne onyń san qyrly áleýetin ashý jolynda atqarǵan mándi de mazmundy jumysyn joǵary baǵalaıdy. Búgingi otyrystyń qorytyndysy ShYU-nyń halyqaralyq bedelin odan ári kóterip, qyzmet tıimdiliginiń artýyna jáne jahannyń qubylmaly jaǵdaıynda naqty strategııalyq múddelerdiń qalyptasýyna septigin tıgizetinine senimdimin, – dedi Qasym-Jomart Toqaev.
Memleket basshysy qol jetken jetistikterdi alǵa tartyp, «Shanhaı ondyǵyna» kiretin elderdiń bári úshin aıryqsha mańyzǵa ıe basty baǵyttarǵa toqtaldy.
– Qaýipsizdik salasyndaǵy ózara senim men yntymaqtastyqty nyǵaıtý. ShYU quramynda Eýrazııanyń iri memleketteri bar. Jańadan sulbalanyp kele jatqan álemdik tártiptiń turpaty qandaı bolmaǵy kóbine osy elderdiń ustanymyna baılanysty. Bul rette Uıymǵa erekshe jaýapkershilik júkteledi. Eýrazııa qurlyǵyndaǵy strategııalyq turaqtylyq jáne senim sharalary boıynsha mınıstrler deńgeıindegi ShYU konferentsııasyn ótkizý qajet dep sanaımyz. Atalǵan is-sharanyń kún tártibinde áskerı táýekelderdi azaıtý, qarýlaný jarysyn tejeý jáne qaýipti oqıǵalardyń aldyn alý máselesin talqylaýǵa bolady. Ásirese, qarýly qaqtyǵystardyń saldary kóbine áskerı is-qımyl aımaqtarynan tysqary jerdi sharpyp, halyqaralyq naryqtarǵa, kommertsııalyq keme qatynasyna, ornyqty energetıkalyq jáne kólik baılanystaryna nuqsan keltirip jatqany alańdatady. Sonymen qatar daǵdarystyń transshekaralyq sıpatta beleń alý qaýpi kúsheıip keledi. Burynnan kele jatqan syn-qaterler de ózektiligin joıǵan joq. «Úsh zulym kúshpen» – terrorızmmen, ekstremızmmen jáne separatızmmen kúres ózara yqpaldastyǵymyzdyń basym baǵyty bolyp qala beredi. Olar transulttyq qylmyspen, esirtki tasymalymen, zańsyz qarý aınalymymen jáne kıberqaýippen astasyp jatyr. Qazaqstan Syn-qaterler men qaýipterge qarsy is-qımyl jónindegi ámbebap ortalyqtyń, sondaı-aq ShYU Esirtkige qarsy ortalyǵynyń maqsattary men mindetterin qoldaıdy. Bul qurylymdardyń qyzmeti memleketterimizdiń quzyrly organdary arasyndaǵy is-áreketti úılestirýdi jańa deńgeıge kóterip, osy baǵyttaǵy birlesken jumystyń nátıjesin jaqsartatynyna senimdimin, – dedi Prezıdent.
Aıta ketelik Toqaev ShYU múshe memleketter basshylary keńesiniń otyrysyna qatysty.
