Prezıdent kıik sanyn retteý máselesin qaıta zerdeleýdi tapsyrdy

BÝRABAI. KAZINFORM – Elimizde ilbister sanyn kóbeıtý qolǵa alynady. Ulttyq quryltaıdyń V otyrysynda Prezıdent Qasym-Jomart Toqaev osyndaı tapsyrma berdi.

- Biz Balqash kóliniń aınalasynda Turan jolbarysynyń popýlıatsııasyn qalpyna keltirýge kiristik. Bul – sharýashylyq qyzmetke baılanysty sheshýge týra keletin kóptegen máselemen qatar júretin kúrdeli mindet.

Kelesi kezekte ilbisterdi saqtap, onyń sanyn kóbeıtýimiz kerek, - dedi Memleket basshysy.

Sondaı-a, Qasym-Jomart Toqaev kıik sanyn retteýge qatysty paıymyn aıtty.

- Keshe jumys sektsııasy kezinde «Aýyl» partııasynyń ókilderi kıikter týraly másele kótergenin bilemin. Aımaqtardan da osyǵan qatysty ótinishter-hattar kelip jatyr. Ruqsatsyz ań aýlaǵandarǵa jazany kúsheıtý úshin meniń bastamammen 2019 jyly zańnamalyq sharalar qabyldandy. Osy jáne basqa da jan-jaqty sharalardyń arqasynda elimizdegi kıik sany kúrt artty. Qazir olarǵa joıylyp ketý qaýpi tónip turǵan joq.

Biraq, endi, basqa másele týyndady. Aýyl sharýashylyǵy zardap shegip jatyr. Epızootııalyq ahýaldyń da kúrdelenip ketý qaýpi bar. Jalpy ekojúıege túsetin salmaq artty. Úkimetke bilikti mamandardy jumyldyra otyryp, osy máseleni jan-jaqty zerdeleýdi jáne baıypty sheshim qabyldaýdy tapsyramyn, - dedi Prezıdent.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.