Prezıdent QHR Memlekettik keńesiniń múshesi, Syrtqy ister mınıstri Van Idi qabyldady

Kezdesý barysynda Qasym-Jomart Toqaev Qytaı dıplomatııasynyń álemdik saıasatta asa mańyzdy ról atqaratynyna toqtaldy.

Onyń aıtýynsha, Qytaıdyń bastamalary jahandyq kún tártibine yqpal etedi jáne halyqaralyq beıbitshilik pen turaqtylyqty saqtaýǵa eleýli úles qosady. Memleket basshysy Qytaıdy taýar óndirý jáne eksporttaý, tehnologııalyq ınnovatsııa, ekonomıkalyq ósim, halyqaralyq ınvestıtsııa jáne basqa da kóptegen salada moıyndalǵan kóshbasshy el retinde atap ótti.

Prezıdent BUU, ShYU, AÓSShK sııaqty halyqaralyq uıymdar aıasyndaǵy qazaq-qytaı qatynastaryna joǵary baǵa berdi.

– Qazaqstan Qytaıdyń senimdi seriktesi jáne solaı bolyp qala beredi. Buǵan deıin qol jetkizilgen ýaǵdalastyqtardy júzege asyrý úshin qoldan kelgenniń bárin jasaımyz. Shyn máninde, eki el arasyndaǵy baılanystar men yntymaqtastyqtyń bolashaǵy zor, – dedi Prezıdent.

Mınıstr Van I qazaq jerinde qurmet kórsetkeni úshin Memleket basshysyna alǵys aıtyp, QHR Tóraǵasy Sı Tszınpınniń izgi tilegin jetkizdi.

Kezdesýde saýda-ekonomıkalyq, energetıkalyq, mádenı-gýmanıtarlyq salalardaǵy ekijaqty yqpaldastyqty odan ári nyǵaıtý perspektıvalary, sondaı-aq úkimetaralyq qatynastardy keńeıtý múmkindikteri talqylandy.

Memleket basshysy QHR Tóraǵasy Sı Tszınpınge sálemin joldap, onyń Astanaǵa jasaıtyn aldaǵy memlekettik saparyna úlken úmit artatynyn jetkizdi.