Prezıdent QHA sessııasynda memlekettik saıasattyń jańa baǵyttaryna toqtaldy – Qarın
ASTANA. KAZINFORM – Qazaqstan halqy Assambleıasynyń sessııasy jaı ǵana mereıtoılyq is-shara ǵana emes, Prezıdent Qasym-Jomart Toqaevtyń memlekettik saıasattyń jańa baǵyttaryn atap ótken taǵy bir mańyzdy oqıǵa retinde este qaldy. Bul týraly Qazaqstan Respýblıkasynyń Memlekettik keńesshisi Erlan Qarın aıtty, dep habarlaıdy Kazinform.
Onyń sózinshe, Memleket basshysynyń baıandamasy mazmundy boldy ári ózekti taqyryptardyń keń aýqymyn qamtydy:
Birinshiden, Prezıdent qazirgi kezdegi kóptegen syn-qaterge qaramastan, ultaralyq kelisimdi nyǵaıtý barlyq memlekettik organdardyń, ásirese, halyqaralyq arenadaǵy kúrdeli shıelenis pen belgisizdik jaǵdaıynda basty basymdyqtardyń biri bolǵanyn, aldaǵy ýaqytta da basty basymdyqtardyń biri bola beretinin atap ótti.
Ekinshiden, Memleket basshysy QHA týraly túrli boljamdardy joqqa shyǵaryp, Assambleıa qyzmetine joǵary baǵa berip, onyń etnosaralyq qatynastar salasyndaǵy barlyq memlekettik saıasatty damytýdyń strategııalyq shtaby retindegi jańa perspektıvti rólin aıqyndady.
Úshinshiden, Qasym-Jomart Toqaev qazaq tiliniń birtindep ultaralyq qatynas tiline aınalýy kerektigin taǵy da qadap aıtty. Biraq bul – evolıýtsııa arqyly júrip kele jatqan beles. Memlekettik tildiń qoldanylý aıasyn keńeıtý mindeti salmaqty, parasatty kózqaras negizinde sheshiledi. Al til máselesin saıasılandyrý nemese arandatý áreketteri toqtatylady.
Tórtinshiden, Memleket basshysy tarıhqa syndarly, obektıvti kózqaraspen qaraý keregin aıtty. Osy turǵyda kele jatqan Jeńistiń 80 jyldyq mereıtoıynyń erekshe mańyzdylyǵyn atap ótti. Elimiz úshin bul soǵysty eske alý, eń aldymen, qaharman jerlesterimizdi eske alý. Elimiz boıynsha 500-den astam kóshege maıdangerlerdiń esimin berý týraly sheshim bizdiń osy soǵysqa qatysýshylardyń rýhyna degen qurmetpen qaraıtynymyzdy taǵy bir márte kórsetedi.
Besinshiden, Prezıdent ishki jáne syrtqy saıasatta árqashan tek ulttyq múddemizdi negizge ala otyryp áreket etetinimizdi, bireýdiń nusqaýyn oryndamaıtynymyzdy naqty aıtty. Sondaı-aq ózara tıimdi yntymaqtastyq pen halyqaralyq quqyq normalaryn saqtaýǵa negizdelgen barlyq seriktespen dıalogqa nazar aýdarý basty orynda ekenin atap ótti.