Prezıdent keıbir basshylardy synady: olardyń jumysqa kómilip jatqan eshteńesi joq

ASTANA. KAZINFORM – «Samuryq-Qazyna» qory jáne ulttyq kompanııalardyń basshylarymen qatań áńgime boldy. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev málim etti.

- Bizge jańa ári sapaly ınvestıtsııa tartýǵa arnalǵan birtutas strategııa qajet. Bul strategııada, eń aldymen, joǵary tehnologııasy bar zamanaýı óndirister ashýǵa basymdyq berilýge tıis. Osy turǵydan alǵanda, jeke bıznes aıryqsha ról atqarady. Kásipkerler ekonomıkamyzǵa sapaly ınvestıtsııa salý arqyly jumys oryndaryn ashady, jurttyń tabysyn arttyrýǵa úles qosady. Biz «Báıterekti» ınvestıtsııalyq holdıng retinde qaıta qurdyq. Mundaı qadamnyń naqty sebebi boldy. Holdıng naryqtyq ekonomıkaǵa serpin berýde, biraq bul qadam jeke bastamalardy shektemeýge tıis, - dedi Qasym-Jomart Toqaev.

Osy oraıda Prezıdent «Samuryq-Qazyna» qoryna da dál osyndaı talap qoıylatynyn aıtty.

- «Samuryq-Qazyna» qory jáne ulttyq kompanııalardyń basshylarymen qatań áńgime boldy. Kompanııalardyń qurylymyn túbegeıli qaıta qarap, jańa zamanǵa beıimdeý kerek. Qosshydan basshy kóp. Basshylyq quramy el aıtyp júrgendeı «Sol jaǵalaýdyń» adamdaryna tolyp qalǵan. Olardyń jumysqa kómilip jatqan eshteńesi joq. Keıde ne isterin bilmeı, áleýmettik jelilerde árkimmen pikir talastyryp otyrady. Bul túbi jaqsylyqqa aparmaıdy, - dedi Memleket basshysy.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.