Prezıdent ken oryndarynyń ónimin bólisý kelisimin jańa shart boıynsha uzartýdy tapsyrdy

ASTANA. KAZINFORM – Memleket basshysy Qasym-Jomart Toqaev Úkimetke iri ken oryndarynyń ónimin bólý jónindegi kelisimdi tıimdi ári jańa sharttarmen uzartý úshin kelissózderdi jandandyrýdy tapsyrdy.

– Іri ken oryndarynyń ónimin bólý jónindegi kelisimdi iske asyrý nátıjesinde Qazaqstan jahandyq naryqqa qýat kózin senimdi jetkizýshige aınaldy. Sonymen qatar qomaqty ınvestıtsııalar uzaqmerzimdi josparlaýdy talap etedi. Sondyqtan Úkimet ónimdi bólý jónindegi kelisimderdi elimizge anaǵurlym tıimdi ári jańa sharttarmen uzartý úshin kelissózderdi jandandyrýy qajet, - dedi Prezıdent Úkimettiń keńeıtilgen otyrysynda.

Sondaı-aq Memleket basshysy bul jobalar elimizdiń áleýmettik-ekonomıkalyq damýyna aıtarlyqtaı úles qosatynyn atap ótti.

Aıta keteıik, qazirgi tańda iri ken oryndarynyń ónimin bólý kelisimine saı jumys istep jatqan jobalar qataryna «Teńiz», «Qarashyǵanaq», «Qashaǵan» sekildi iri munaı-gaz ken oryndary bar.

Máselen, «Teńiz» ken ornyn ıgerýge qatysty kelisimge 1993 jyly qol qoıyldy. Ol 40 jylǵa, ıaǵnı 2033 jylǵa deıin eseptelgen. Іri ken oryndarynyń ishinde birinshi kezekte osy ken ornynyń kelisim merzimi qaralady.

Sol sekildi 2038 jyly «Qarashyǵanaq», 2042 jyly «Qashaǵan» ken oryndarynyń kelisim merzimi aıaqtalady.

Kúni keshe «Qashaǵannan» alǵashqy munaı partııasy Baký portyna jiberildi. Qazaqstandyq «Taraz» tankeri Aqtaý portynan jolǵa shyqty.