Prezıdent keleshekte ashylatyn iri óndiris oshaqtaryn atady
ASTANA. KAZINFORM – Prezıdent Qasym-Jomart Toqaev BAQ salasy qyzmetkerlerin marapattaý rásiminde sóılegen sózinde sheteldik ınvestorlardyń Qazaqstanda qandaı óndiris oshaqtaryn ashatynyn aıtty.
«Keıingi jyldary Qazaqstannyń ınvestıtsııalyq tartymdylyǵy artyp keledi. Sheteldik ınvestorlardyń qatysýymen elimizde ekonomıkany ártaraptandyrýǵa jáne jańa jumys oryndaryn ashýǵa baǵyttalǵan ári qarjylandyrý kólemi úlken ondaǵan, tipti júzdegen joba júzege asyrylyp jatyr. Mysaly, Almaty oblysynda 2026 jyly álemge áıgili Pepsico kompanııasynyń Ortalyq Azııadaǵy eń iri zaýyty ashylady. Bıyl Shymkentte túrkııalyq seriktestermen birlesip, iri jylyjaı kesheni qurylysynyń birinshi kezeńin aıaqtaý josparlanyp otyr. Qytaılyq áriptestermen Abaı oblysynda jylyna 300 myń tonna mys qorytatyn zaýyt salý týraly kelisimge qol jetkizildi. Jobanyń bastapqy quny – 1,5 mıllıard dollar, myńnan astam jańa jumys orny ashylady», - dedi Qasym-Jomart Toqaev.
Memleket basshysy Atyraý oblysynda polıetılen shyǵaratyn ıntegratsııalanǵan gaz-hımııa keshenin salý josparda bar ekenin eske saldy.
«Meniń tapsyrmammen Úkimet elimizdiń batys aımaqtaryn áleýmettik-ekonomıkalyq turǵydan damytý úshin jedel sharalar toptamasyn ázirlep jatyr. Onyń nátıjesi kóp kúttirmeıdi dep oılaımyn», - dedi Prezıdent.
