Prezıdent KEDEN, SmartCargo aqparattyq júıeleri men kólik-logıstıka salasyndaǵy tsıfrlyq jobalarmen tanysty
ASTANA. KAZINFORM – Qasym-Jomart Toqaevqa KEDEN, SmartCargo aqparattyq júıeleri men kólik-logıstıka salasyndaǵy tsıfrlyq jobalar kórsetildi
Atap aıtqanda, KEDEN biryńǵaı tsıfrlyq platformasy kedendik baqylaý úderisin ońtaılandyrýǵa jáne jetildirýge, saýda barysy men shekaradan ótýdi jeńildetýge arnalǵan.
Al SmartCargo – keden, kólik, Іshki ister mınıstrligi, Aýyl sharýashylyǵy mınıstrligi, farmatsevtıkalyq jáne saýdany retteý servısterin biriktiretin logıstıkalyq qyzmetterdiń biregeı tsıfrlyq terezesi.
National Road Geoportal (KazMaps) monıtorıng pen ınfraqurylymǵa arnalǵan Qazaqstan avtojoldarynyń tsıfrlyq kartasyn usynady.
Budan bólek, Memleket basshysy Almaty qalasynyń ІT ekojúıesimen jáne bilim berý, maman daıarlaý, balalar qaýipsizdigin, qoǵamdyq tártip pen jol-kólik qozǵalysyn baqylaý sekildi tsıfrlyq sheshimdermen tanysty.
Sonymen qatar Prezıdent Ortalyq Azııadaǵy balalarǵa arnalǵan alǵashqy ǵylymı mýzeıdi aralady.
GITEX AI Central Asia & Caucasus 2026 kórmesine 600-den asa halyqaralyq kompanııa, sonyń ishinde Cisco, Cloudflare, Google Cloud, Huawei, Dell, H3C Technologies, Lenovo, Trend Micro, Hikvision, HP, Noventiq, Redington, Salesforce, Vertiv jáne basqa da álemdik tehnologııa kóshbasshylary qatysýda.
Aıta keteıik, búgin Memleket basshysy GITEX AI Central Asia & Caucasus kórmesine bardy.
