Prezıdent: Qazirgi bulyńǵyr dáýirge jaýabymyz — qurylys jáne taǵy da qurylys
ASTANA. KAZINFORM — Otandyq sportshylardyń jeńisti joly elimizde bolyp jatqan túbegeıli ózgerister rýhymen tereń úndesedi. Bul pikirdi Prezıdent Qasym-Jomart Toqaev Azııa oıyndary jáne Azııa paraoıyndarynyń júldegerlerin marapattaý rásiminde aıtty.
Prezıdent sońǵy jyldary elimizdiń ekonomıkasy aıtarlyqtaı nyǵaıyp, jańa damý kórsetkishterine qol jetkize bastaǵanyn tilge tıek etti.
— Halyqaralyq valıýta qorynyń boljamy boıynsha memleketimizdiń jalpy ishki óniminiń kólemi 398 mıllıard dollarǵa jaqyndaıdy. Bul — bizdiń aımaǵymyzdaǵy eń joǵary kórsetkish bolmaq. Biraq qazirgideı qubylmaly ýaqytta, árıne, qolda bar tabysqa máz bolyp, jaıbaraqat otyrýǵa bolmaıdy. Bárimiz osyndaı almaǵaıyp zamanda elimizdiń áleýetin arttyra túsý úshin belsendi ári qajyrly eńbek etýimiz kerek, — dedi ol.
Memleket basshysy aldymyzda turǵan bıik maqsattar men aýqymdy jumysqa toqtaldy.
— Ózderińiz bilesizder, men jaqynda jarııalaǵan halyqqa Joldaýymda bul mindetterge jan-jaqty toqtalyp óttim. Elimizde kelesi jyly «Jalpyhalyqtyq aýqymdy qurylys jyly» aıasynda iri qurylys naýqany bastalady. Degenmen muny jaı ǵana ýaqytsha naýqan emes, naǵyz «Halyqtyq qurylys», ıaǵnı, tutas qoǵamnyń ıgiligi úshin isteletin tarıhı qurylys jumysy dep túsingen jón. Elimizdiń ár azamaty, ásirese, óskeleń urpaq qaýipsiz, qolaıly jáne sapaly ortada ómir súrýge haqy bar. Bul mindetti oryndaý el Prezıdenti retinde men úshin birinshi qatardaǵy basymdyq bolmaq. Sondyqtan «Halyqtyq qurylys» barysynda elimizdiń barlyq aımaǵynda kóptegen áleýmettik nysandar — mektepter, aýrýhanalar, emhanalar, erekshe qajettiligi bar balalardy ońaltý ortalyqtary, mádenıet jáne óner oshaqtary, sport ortalyqtary, sondaı-aq turǵyndarymyzdyń turmys sapasyn jaqsartatyn asa qajetti ınfraqurylym nysandary salynady. Shyn máninde, biz buryn-sońdy bolmaǵan «Halyqtyq qurylys» baǵdarlamasyn iske asyrýǵa kirisip jatyrmyz. Bul bastama elimizdiń keskin-kelbetin túbegeıli ózgertip, azamattardyń turmys sapasyn aıtarlyqtaı arttyra túsedi. Aýqymdy qurylys qalalar men aýdandardyń barlyǵynda júrgizilip, azamattyq ınfraqurylymdy túgel jańǵyrtady. Qazirgi bulyńǵyr, boljamsyz dáýirge degen bizdiń jalpyulttyq jaýabymyz: bul — «Qurylys jáne taǵy da qurylys!». Sebebi, menińshe, qurylys jumystary, bul — elimizdiń áleýmettik-ekonomıkalyq ahýalyn arttyrýdyń jalǵyz ǵana joly. Bul sózdiń astarynda keleshek urpaqtyń ıgiligine berik negiz qalaıtyn jasampazdyqqa tutas ultty jumyldyrý mindeti tur, — dedi Prezıdent.
Aıta keteıik, Aqordada Prezıdent Azııa oıyndary jáne Azııa paraoıyndarynyń jeńimpazdary men júldegerlerin marapattady.
Japonııada ótken XX jazǵy Azııa oıyndary aıaqtalady. Qazaqstan quramasy 84 medal (12 altyn, 24 kúmis jáne 48 qola) oljalap, 46 eldiń ishinde jalpykomandalyq esepte 8-orynǵa turaqtady.
Al Azııa Paraoıyndarynda Qazaqstan 50 medal jeńip alyp, úzdik ondyqqa endi.
