Prezıdent «Qazaqtelekom» AQ basqarma tóraǵasyn qabyldady

NUR-SULTAN. QazAqparat - Memleket basshysyna Qazaqstannyń telekommýnıkatsııa salasynyń qazirgi ahýaly, onyń mobıldi segmentiniń damýy, halyq pen bızneske kórsetiletin qyzmetterdiń sapasyn jaqsartý jáne onyń aıasyn keńeıtý jónindegi jumystar týraly baıandaldy, dep habarlaıdy QazAqparat Aqordanyń resmı saıtyna silteme jasap.

Qasym-Jomart Toqaevqa 5G jelisin engizýdyń jáne tsıfrlyq teńsizdikti odan ári tómendetýdiń perspektıvalary týraly málimet berildi. Atap aıtqanda, Qýanyshbek Esekeev Prezıdentke 2018-2020 jyldary aýyldyq jerlerde salynǵan optıkalyq-talshyqty magıstral bazasynda jergilikti jelilerdi salý boıynsha jobalardy júzege asyrý týraly aıtty. «Tsıfrlyq seriktes» baǵdarlamasy aıasynda joǵary jyldamdyqty ınternetti árbir úıge jetkizý jobasyna jeke servıstik kompanııalar qosylǵan.

Sonymen qatar, Memleket basshysy kompanııanyń 2300 MGts dıapazonyndaǵy FWA (Fixed Wireless Access, tirkelgen symsyz baılanys) ozyq tehnologııasyn paıdalaný jónindegi josparymen tanysty.

Kezdesý qorytyndysy boıynsha Qasym-Jomart Toqaev kompanııanyń qala men aýyl arasyndaǵy tsıfrlyq teńsizdikti tómendetý jónindegi qazirgi qyzmetine, sondaı-aq ulttyq telekom-operatordyń perspektıvasy bar jobalaryna qatysty birqatar naqty tapsyrma berdi.