Prezıdent Qazaqstannyń syrtqy saıasatynyń basymdyqtaryn atady
NUR-SULTAN. QazAqparat - QR Prezıdenti Qasym-Jomart Toqaev Qazaqstannyń syrtqy saıasatynyń basymdyqtaryn atady, dep habarlaıdy QazAqparat tilshisi.
«Qazaqstan álemdik arenada úlken abyroı jınady. Ózin beıbitshilikti súıetin, ashyq, senimdi memleket retinde bekitti. Halyqaralyq isterde senimdi ári jaýapty seriktes ekenin bekemdedi», - dedi Qasym-Jomart Toqaev elordadaǵy ulyqtaý rásiminde.
Ol sonymen qatar, Qazaqstannyń syrtqy saıasaty qandaı bolatynyn aıtyp berdi.
«Biz konstrýktıvti, úılesimdi, kópvektorly baǵytty jalǵastyramyz. Álemdik arenada ulttyq múddeni qorǵaıtyn bolamyz. Eldiń syrtqy saıasatynyń jumysy elge, ulttyq bızneske, árbir azamatqa paıda ákeletin bolady», - dedi Prezıdent.
Aıta ketsek, elordada jańadan saılanǵan QR Prezıdenti Qasym-Jomart Toqaevty ulyqtaý rásimi ótti. Q. Toqaevty ulyqtaý rásimine Úkimet músheleri, Parlament depýtattary, Konstıtýtsııalyq keńes músheleri, Joǵarǵy sot sýdıalary, Qazaqstanda tirkelgen dıplomatııalyq korpýs ókilderi jáne basqa da shaqyrylǵan qonaqtar qatysty.
Ulyqtaý rásiminde Qasym-Jomart Toqaev Qazaqstan halqyna ant berdi. Ant bergen sátten bastap jańadan saılanǵan Prezıdent resmı qyzmetine kirisken bolyp sanalady.
