Prezıdent: Qazaqstannyń birligin shaıqatýǵa eshkimge de jol bermeýimiz qajet
ASTANA. 5 qyrkúıek. QazAqparat - Barsha qazaqstandyqtyń birligi - bul biregeı qundylyq. Bul týraly búgin Astanadaǵy Nazarbaev Ýnıversıtetindegi ınteraktıvtik dárisi barysynda Qazaqstan Respýblıkasynyń Prezıdenti Nursultan Nazarbaev málim etti.
«Birinshiden, 140 ulystan quralǵan barsha qazaqstandyqtyń birligi - bul biregeı qundylyq. Bizdiń maqsat - ony qasterleý, qorǵaý jáne arttyra túsý. Biz óziniń resýrsymen álemdik muhıtta tabysty júzip kele jatqan qaıyǵymyzdy shaıqatýǵa eshkimge de jol bermeýimiz qajet», - dedi Memleket basshysy.
«Qazaqstan atty qazaq jerinde ómir súrip jatyrmyz. Tarıhı jolmen biz kóp ulysty memleketke aınaldyq. Bizdiń tolaǵaı tabystarymyz ortaq, barlyǵymyz da birge jumys istedik. Sondyqtan túsiný kerek, barlyq másele durys ári ornymen kele jatyr», - dedi Prezıdent.
«Meniń ár ýaqytta aıtatynym: ishimizdegi birlikti, ásirese qazaq halqynyń birligin saqtap, sodan keıin barsha halyqpen birligimizdi saqtasaq, kórshilerimizben jáne el ishinde de durys bolamyz, sondaı-aq bolashaǵymyz ashyq ári jolymyz aq bolady», - dep túıindedi N. Nazarbaev.
