Prezıdent Qazaqstannyń árqashan preventıvti dıplomatııany jaqtaıtynyn aıtty

SOChI. QazAqparat – Qazaqstan aımaqtyq daý-janjaldardy retteýde adal bitimgerlikti durys kóredi jáne preventıvti dıplomatııa men qarýsyzdandyrýdyń júıeli jaqtaýshysy bolyp qala beredi. Bul týraly Sochıde ótip jatqan «Valdaı» Halyqaralyq pikirtalas klýbynyń jylsaıynǵy XVI otyrysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat.

«Qazaqstan aımaqtyq daý-janjaldardy retteýde adal bitimgerlikti durys kóredi jáne preventıvti dıplomatııa men qarýsyzdandyrýdyń júıeli jaqtaýshysy bolyp qala beredi. Mysaly, Astana protsesi aıasynda sırııaaralyq kelissózdiń 13 raýndy ótti. Onda Reseı tarapynyń jaǵymdy róli aıqyn kórinip tur», - dep atap ótti Memleket basshysy.

«Sırııalyq sıýjet - Taıaý Shyǵysta qalyptasqan asa aýyr jaǵdaıdyń bir elementi. Sondyqtan Qazaqstannyń halyqaralyq resýrstaryn eskere otyryp, BUU Bas assambleıasynyń minberinen atalǵan aımaq úshin ómirsheń sheshimderdi tabýǵa baǵyttalǵan kúsh-jigerdi qoldaýǵa daıyn ekenimdi jetkizdim», - deıdi Prezıdent.

«Biz Aýǵanstanǵa jiti kóńil bólip, tıisti kómekti kórsetip otyrmyz. Sońǵy aılarda ondaǵy jaǵdaı, ókinishke qaraı, aıtarlyqtaı qıyndap ketti. Barlyq múddeli taraptardyń kómegimen aýǵanaralyq protsess bul elge kópten kútken beıbit ómirdi ala keledi degen úmittemiz», - dep atap ótti Q. Toqaev.

Aıta keteıik, Qazaqstan Prezıdenti Qasym-Jomart Toqaev Sochıde ótip jatqan «Valdaı» Halyqaralyq pikirtalas klýbynyń jylsaıynǵy XVI otyrysyna qatysty. «Álemdik qurylym: Shyǵystan kózqaras» taqyrybymen ótip jatqan «Valdaı» Halyqaralyq pikirtalas klýbynyń jylsaıynǵy XVI otyrysyna Qazaqstan Prezıdentimen birge Iordanııa koroli Abdalla II, Ázerbaıjan Prezıdenti Ilham Álıev jáne Fılıppın Prezıdenti Rodrıgo Dýterte qatysyp jatyr.