Prezıdent Qazaqstannyń Eýrazııadaǵy tranzıt haby retindegi rólin arttyrýdy tapsyrdy
ASTANA. KAZINFORM – Memleket basshysy Qasym-Jomart Toqaev keńes barysynda Qazaqstannyń Eýrazııadaǵy tranzıt haby retindegi rólin arttyra túsý qajet ekenin aıtty, dep habarlaıdy Aqordanyń baspasóz qyzmeti.
– Altynshy másele. Mańǵystaý oblysy elimizdiń tranzıttik áleýetin arttyrý isinde mańyzdy ról atqarady. Bul – Shyǵys pen Batys, Soltústik pen Ońtústik arasyndaǵy halyqaralyq kólik dálizderi toǵysqan biregeı jer. Biz teńiz ınfraqurylymyn, sonyń ishinde Aqtaý jáne Quryq porttaryn damytýǵa erekshe mán berip otyrmyz. Osy aılaqtar Transkaspıı halyqaralyq kólik dálizindegi negizgi toraptyń biri sanalady.
Keıingi jyldary bul dáliz arqyly júk jetkizý merzimi úsh ese qysqardy. Tasymal quny turaqtaldy. Ozyq tehnologııalar jappaı engizile bastady. Halyqaralyq logıstıkalyq kompanııalar elimizdiń kólik salasyna ınvestıtsııa salýǵa qyzyǵýshylyq tanytyp otyr. Olar, ásirese, teńiz porttaryn damytý isine qarjy quıýǵa múddeli. Úkimet oblys ákimdigimen birlesip, shetel ınvestorlarymen belsendi jumys isteýi kerek, - dedi Prezıdent.
Memleket basshysy sonymen qatar kólik, temirjol jáne teńiz porty ınfraqurylymyn damytýdy jedeldetýdi tapsyrdy.
– Qazaqstannyń Eýrazııadaǵy negizgi tranzıt haby retindegi rólin arttyra túsý qajet. Kólik, temir jol jáne teńiz porty ınfraqurylymyn damytýǵa arnalǵan jobalardy tezdetip júzege asyrý kerek. Bıyl Quryq-Jetibaı tas jolyn jóndeý jumysy aıaqtalady. Endi Túrikmenstan baǵyty boıynsha kólik-tasymal áleýetin arttyrý qajet. Jańaózennen shyǵyp, Kendirli arqyly Túrikmenstan shekarasyna deıin baratyn kúre joldy jóndeýge bıyldan bastap kirisýdi tapsyramyn. Temir jol beketterin jańǵyrtý jáne jańartý jumysy bastaldy. Elimiz boıynsha 125 vokzaldy jóndeý josparlanyp otyr. Onyń ishinde Mańǵystaý, Beıneý jáne Shetpe beketteri bar. Jolaýshylarǵa, ásirese, óz betimen júrip-turýy qıyn azamattarǵa qolaıly jaǵdaı jasalady. Bul sharalar oblystaǵy jáne jalpy elimizdegi kólik qatynasyn jaqsarta túsetini sózsiz.
Alty jyldan beri toqtap turǵan «Beıneý astyq termınaly» bıyl qańtarda iske qosyldy. Qazir onda bir mezette 100 myń tonna astyq saqtaýǵa bolady. Sondaı-aq kúnine 150 tonna – un, 50 tonna – jem shyǵarýǵa múmkindik bar. Al jańǵyrtý jumysynan keıin bul kórsetkishter 400 tonna un jáne 100 tonna jemge deıin artady. Astyq termınalynyń qýatyn arttyryp, tolyq jumys isteýin qamtamasyz etken jón. Ony qurlyqtaǵy Ótkel kesheni retinde paıdalaný qajet. Sol arqyly Kaspıı mańyndaǵy elderge óz ónimderimizdi eksporttaı alamyz, - dedi Qasym-Jomart Toqaev.