Prezıdent Qazaqstannyń eki portyn Belgııanyń iri logıstıkalyq ortalyǵymen baılanystyrýdy usyndy
ASTANA. KAZINFORM — Aqtaý men Quryq porttary Belgııanyń Antverpen-Brıýgge keshenimen áriptestik ornatýy múmkin, dep habarlaıdy Aqordanyń baspasóz qyzmeti.
Qasym-Jomart Toqaevtyń pikirinshe, kólik-logıstıka qarym-qatynasty nyǵaıtatyn negizgi baǵyttardyń biri sanalady. Prezıdent Qazaqstan temirjol jáne avtokólik ınfraqurylymyn, Orta dáliz boıyndaǵy teńiz porttary men termınaldaryn jańǵyrtýǵa aýqymdy ınvestıtsııa quıyp jatqanyn málimdedi.
— Osy oraıda, Eýropadaǵy iri logıstıkalyq ortalyqtyń biri retinde Belgııanyń baı tájirıbesinen úırenerimiz kóp. Antverpen-Brıýgge port kesheni men Kaspıı teńizindegi Aqtaý, Quryq porttary arasynda nátıjeli seriktestik ornaıtynyna senimdimiz. Bul Qazaqstannyń metall, munaı hımııasy men aýyl sharýashylyǵy ónimderin úlken naryqqa shyǵarýǵa múmkindik beredi, — dedi Qasym-Jomart Toqaev.
Memleket basshysy jasandy ıntellekt pen tehnologııalyq ındýstrııany damytý ózara seriktestiktiń negizgi basymdyǵy ekenin aıtty.
— Jasandy ıntellekt pen tsıfrlyq tehnologııa múmkindigin paıdalana otyryp, AlemAi, Alatau City sekildi iri bastamalardy jedel iske asyramyz. Ónerkásiptiń ozyq salalary atalǵan ortalyqtarda qalyptasady. Belgııanyń jartylaı ótkizgishterdi zertteý salasynda pozıtsııasy myqty. Osy artyqshylyqty eskerip, birlesken jobalardy iske asyrýǵa jáne seriktestikti damytýǵa bolady, — dedi Prezıdent.
Osyǵan deıin Toqaev pen Korol Fılıpp Qazaqstan-Belgııa iskerlik keńesiniń tórtinshi otyrysyna qatysqanyn jazǵanbyz.
