Prezıdent: Qazaqstannyń bedelin arttyryp, kóshin alǵa bastaıtyn jalyndy jastar
ASTANA. KAZINFORM — Memleket basshysy «Aıbyn» HІI halyqaralyq áskerı-patrıottyq jastar jıynynda sóz sóıledi. Bul týraly Aqordanyń baspasóz qyzmeti habarlady.
Prezıdent Qasym-Jomart Toqaev Aqmola oblysynyń Şýchınsk qalasynda ótip jatqan «Aıbyn» HІI halyqaralyq áskerı-patrıottyq jastar jıynyna qatysty.
«Aıbyn-2026» baǵdarlamasyna áskerı-sporttyq, ıntellektýaldyq, shyǵarmashylyq jáne áskerı-qoldanbaly sport túrleri boıynsha jarystar endi. Bıylǵy jıyn Qazaqstannyń birneshe aımaǵynan, sondaı-aq Ázerbaıjan, Qyrǵyzstan, Reseı jáne Ózbekstan elderinen kelgen 50-den astam komandanyń basyn qosty.
Memleket basshysy bul óskeleń urpaqtyń rýhyn shyńdaıtyn, olardy otanshyldyqqa tárbıeleıtin óte mańyzdy is-shara ekenin atap ótti.
— Baıraqty básekede elimizdiń eń myqty, eń jigerli jas sarbazdary laıyqty óner kórsetti. Sondaı-aq Ázerbaıjan, Qyrǵyzstan, Ózbekstan jáne Reseıden kelgen dostas, baýyrlas memleketterdiń jastary baq synady. Búgin men bárińizge zor rızashylyǵymdy bildiremin. Dúbirli doda elimiz úshin shyn máninde asa mańyzdy kezeńde ótip jatyr. Naýryz aıynda Qazaqstannyń jańa Konstıtýtsııasy qabyldandy. Bul — memleketimizdiń keleshegin aıqyndaıtyn, ultymyzdyń taǵdyryna tikeleı áser etetin tarıhı oqıǵa. Tutas jurtymyzdyń arman-muratyn toǵystyrǵan Ata zań, eń aldymen, óskeleń urpaqtyń ıgiligi úshin qabyldandy. Kez kelgen eldiń bolashaǵy — ózderińiz sekildi otanshyl, bilimdi, eńbekqor, jasampaz jáne batyl jastardyń qolynda. Qazaqstannyń bedelin arttyryp, kóshin alǵa bastaıtyn da — jalyndy jastar! Men sizderge zor úmit artamyn! — dedi Qasym-Jomart Toqaev.
Aıta ketelik Qazaqstanda «Aıbyn-2026» halyqaralyq áskerı-patrıottyq jıyny bastalǵany týraly jazǵan edik.
