Qıyn-qystaý kezde halqymyz ózin taǵy da eń jaqsy qyrynan tanytty — Prezıdent
ASTANA. KAZINFORM — Prezıdent Qasym-Jomart Toqaev sý tasqynyna qarsy kúreste kórsetken qoldaýy men kómegi úshin qazaqstandyqtarǵa jáne shet memleketterdiń basshylaryna rızashylyǵyn bildirdi.
«Elimizdiń birqatar óńirinde tabıǵı apat oryn alǵan sátten beri meniń atyma dostas memleketterdiń basshylarynan jyly lebizderi men kómek kórsetý jóninde usynystary jazylǵan hattar kelip túsip jatyr. Qazaqstan joıqyn sý tasqyny kezinde járdem berýge daıyn ekenin bildirgeni úshin dostas elderge shyn júrekten alǵys aıtady. Meniń tapsyrmam boıynsha Premer-Mınıstr bastaǵan respýblıkalyq shtab tótenshe jaǵdaıdyń saldaryn barynsha azaıtý úshin pármendi sharalar qabyldap jatyr. Zardap shekken barlyq azamatqa qajetti kómek kórsetilýde. Olardyń búkil shyǵyndary óteledi» dep jazdy Memleket basshysy Instagram paraqshasynda.
Onyń aıtýynsha, bir de bir adam nazardan tys qalmaıdy.
«Ony jýyrda otandastaryma arnalǵan úndeýimde aıttym. Apatqa qarsy kúres jalǵasýda. Qıyn-qystaý kezde halqymyz ózin taǵy da eń jaqsy qyrynan tanytyp, birlik pen tózimdiliktiń úlgisin kórsetkeni qýantady. Qazaqstan azamattaryna shyn júrekten alǵys aıtamyn!» dedi Qasym-Jomart Toqaev.
