Prezıdent qazaqstandyqtardy Jańa Konstıtýtsııanyń kúshine enýimen quttyqtady
ASTANA. KAZINFORM — Memleket basshysy Qasym-Jomart Toqaevtyń Qazaqstannyń Jańa Konstıtýtsııasynyń kúshine enýine oraı úndeý jasady. Bul týraly Aqordanyń baspasóz qyzmeti málim etti.
— Jańa Konstıtýtsııamyzdyń zańdy kúshine enýi — búkil elimiz úshin aıryqsha mańyzdy oqıǵa. Barshańyzdy shyn júrekten quttyqtaımyn! Búgin táýelsiz Qazaqstan tarıhynyń jańa dáýiri bastalady. Biz saıası-ekonomıkalyq reformalardyń, aýqymdy ózgeristerdiń jáne qarqyndy damýdyń dańǵyl jolyna túsemiz. Osy erekshe kún elimizdiń búkil saıası júıesin, sondaı-aq memlekettiń jáne azamattyq qoǵamnyń negizgi ınstıtýttaryn túbegeıli jańǵyrtý kezeńi bastalǵanyn ańǵartady. 15 naýryzda ótken jalpyulttyq referendýmda Qazaqstan halqy el taǵdyryna tikeleı yqpal etetin jáne memlekettiń ondaǵan jyldarǵa arnalǵan damý baǵdaryn aıqyndaıtyn tańdaýyn jasady. Mıllıondaǵan otandasymyz berekeli birlik tanytyp, shynaıy otanshyldyq pen joǵary jaýapkershiliktiń ozyq úlgisin kórsetti. Bul tarıhı sheshimniń tól shejiremizde altyn árippen jazylatyny anyq. Budan bylaı Konstıtýtsııa kúni «Naýryznama» onkúndigimen qatar atalyp ótedi. Munyń sımvoldyq máni zor. Konstıtýtsııa kúni el ishinde ǵasyrlar boıy ornyqqan kóktemgi jańarý dástúrlerin Ata zańnyń basty qaǵıdattarymen toǵystyrady, ıaǵnı azamattarymyzdyń yrysty yntymaqqa, ozyq bilimge, el ıgiligi jolynda adal eńbek etýge degen talpynysymen úndesedi. Biz naǵyz Halyq Konstıtýtsııasynyń myzǵymas quqyqtyq negizine arqa súıep, barlyq maqsat-murattarymyzǵa mindetti túrde jetemiz. Zań men Tártip, Eńbeksúıgishtik pen Órleý, Tazalyq pen Tabıǵatty aıalaý syndy jasampazdyq qundylyqtaryn qoǵamda berik ornyqtyramyz. Buǵan esh kúmánim joq. Biz birligi bekem, birtutas ult retinde álemdik órkenıettiń shyńyn baǵyndyryp, barshaǵa birdeı múmkindik beretin jáne barlyq azamattyń jan-jaqty damýyna jol ashatyn memleketti — Ádiletti Qazaqstandy quramyz! Qasterli Otanymyzdy kórkeıtý jolyndaǵy josparlarymyzdy oıdaǵydaı oryndaımyz. Men buǵan kámil senemin! Qazaqstan Respýblıkasy jasaı bersin! Halqymyz máńgi jasasyn, — delingen habarlamada.
Aıta keteıik, búgin jańa Konstıtýtsııa kúshine endi. Jalpyhalyqtyq referendým nátıjesinde qabyldanǵan tarıhı qujat memlekettik basqarý júıesin, qoǵamnyń damý baǵytyn túbegeıli ózgertpek.
