Memleket áıelderdiń quqyqtaryn qorǵaýǵa árdaıym basa nazar aýdarady – Qasym-Jomart Toqaev

ASTANA. KAZINFORM – Memleket basshysy Qasym-Jomart Toqaev qazaqstandyqtardy 8 naýryz – Halyqaralyq áıelder kúnimen quttyqtady, dep habarlaıdy Aqordanyń baspasóz qyzmeti.

- Qymbatty hanymdar!

Barshańyzdy Halyqaralyq áıelder kúnimen shyn júrekten quttyqtaımyn! Bul – sulýlyq pen meıirimdiliktiń sımvolyna aınalǵan shýaqty mereke.

Halqymyz ejelden anasyn ardaqtap, qyzdaryn qadirleı bilgen. Kóptegen arýlarymyzdyń esimi tól tarıhymyzǵa altyn árippen jazylǵan.

Qazir Qazaqstanda áıelder túrli kásippen aınalysyp, bızneste jáne qoǵamdyq qyzmette zor tabysqa jetip júr. Olar bıik belesterdi baǵyndyryp qana qoımaı, sanaly urpaq tárbıeleý jolynda aıanbaı eńbek etip keledi.

Barlyq áıelderdiń adal eńbegi eń joǵary baǵaǵa laıyq. Osy sátti paıdalanyp, Qazaqstandaǵy analar men arýlardyń bárine shynaıy rızashylyǵymdy bildiremin.

Memleket áıelderdiń quqyqtaryn qorǵaýǵa jáne barsha azamattyń jan-jaqty damýy úshin jaǵdaı jasaýǵa árdaıym basa nazar aýdarady.

Janashyrlyq, jaýapkershilik, jasampazdyq sııaqty asyl qasıetterdi boıyna sińirgen áıelder qaýymy elimizdegi aýqymdy ózgeristerdi júzege asyrýǵa zor úles qosa beredi dep senemin.

Barshańyzǵa myqty densaýlyq, baq-bereke tileımin! - delingen Memleket basshysynyń quttyqtaýynda. 

Osyǵan deıin Memleket basshysy Qasym-Jomart Toqaevtyń qatysýymen 8 naýryz – Halyqaralyq áıelder kúnine arnalǵan saltanatty jıyn ótti.

Sondaı-aq Prezıdent jarlyǵymen birqatar sala mamandary memlekettik nagradalarmen marapattalady.