Memleket basshysy qazaqstandyqtardy Eńbek kúnimen quttyqtady

Qurmetti otandastar!

Sizderdi Eńbek kúnimen quttyqtaımyn!

Bul — qarym-qabiletimen, aqyl-parasatymen jáne qajyrly eńbegimen qasterli Otanymyzdyń ósip-órkendeýine zor úles qosyp júrgen túrli mamandyq ıeleri ulyqtalatyn, olarǵa qurmet kórsetiletin mereıli kún.

Óz isin jetik meńgergen kásibı maman bolý — qazirgi zamannyń asa mańyzdy talaby. Bilikti, jaýapkershiligi joǵary, eńbekqor jáne tártipti azamattardyń arqasynda kóptegen elder, sonyń ishinde Qazaqstan da áleýmettik-ekonomıkalyq turǵydan mol tabysqa jetýde.

Álem halyqtaryna ortaq «Eńbek — bárin jeńbek» naqyl sóziniń máni zor, maǵynasy tereń. Tabandy eńbek — jetistikke jetýdiń kózi. Adal nıetpen atqarylǵan árbir is — qadirli, kez kelgen eńbek — zor qurmetke laıyq.

Búgingi tańda Qazaqstan jańa tarıhı kezeńge qadam basty. Aldymyzda aýqymdy mindetter tur. Konstıtýtsııamyz jáne onda aıqyn kórinis tapqan Ádiletti Qazaqstan, zańǵa baǵyný, birlik pen yntymaq, eńbekqorlyq pen ilgerileý, tabıǵatqa qamqorlyqpen qaraý ıdeıalary — elimizdiń turaqty damýyna jol ashatyn temirqazyq.

Qazir qoǵamymyzda «Adal adam — Adal eńbek — Adal tabys» atty jańa etıka qalyptasty. Byltyr Jumysshy mamandyqtar jylyn atap óttik. Bul bastama eńbek adamynyń qoǵamdaǵy mártebesin arttyryp, tálimgerlik dástúri men eńbek áýletteriniń mán-mańyzyn nyǵaıta túsýge tyń serpin berdi.

Memleket aldaǵy ýaqytta da azamattarymyzdyń jan-jaqty damýy úshin qolaıly jaǵdaı jasaı beredi. Jastarǵa kásibı bilim berý, olardyń eńbek daǵdylaryn ushtaý, sondaı-aq, óskeleń urpaqtyń boıyna aǵa býynnyń baı ómirlik tájirıbesi men taǵylymyn sińirý — asa mańyzdy mindet. Jastary jasampaz eldiń bolashaǵy da jarqyn, damýy da qarqyndy bolary aıqyn.

Biz yntymaǵy jarasqan, maqsat-múddesi ortaq birtutas ult retinde ádildik, tabıǵatty aıalaý, zań ústemdigi, órkendeý qundylyqtary jáne, eń bastysy, eńbekqorlyq qasıeti is júzinde ornyqqan el bolamyz. Men buǵan kámil senemin.

Qurmetti otandastar, barshańyzǵa myqty densaýlyq, amandyq jáne tolaǵaı tabys tileımin!

Elimiz ósip-órkendeı bersin!